Kuva Shampiyona yo mu gihugu cy ‘Ubwongereza yatangira, ikipe ya Arsenal yari iyoboye urutonde rwa shampiyona kugeza ni mugoroba ubwo yahuraga n’ikipe ya Manchester City bari bahanganye.
Ni nyuma y’umukino wabaye i saa tatu n’igice z’ijoro ryo kuri uyu wa gatatu tariki 15 Gashyantare 2023, ubwo ikipe ya Arsenal yari yakiriye Manchester City bikaza kurangira isuzuguriwe iwayo ndetse ikurwa ku mwanya wa mbere yari imazeho igihe kirekire.
Ikipe ya Man City niyo yabanje igitego gitsinzwe na Kevin de Bryune ku munota wa 24 w’igice cya mbere cyaje kwishyurwa ku munota wa 34 gitsinzwe na Bukayo Saka kuri Penalite ari nako amakipe yose yagiye mu gice cya mbere anganya igitego 1_1.
Ibintu byahinduye isura ku munota wa 72 aho Jack Grealish wa Man City yatsindaga igitego cya kabiri ku mupira yahawe na Ikay Gundogan aho byaje gushimangirwa na rutahizamu Erling Halaand waje gusongezamo igitego cya gatatu ku munota wa 82 ku mupira yahawe na Kevin de Bryune umukino urangira Man City ifite ibitego 3_1.
Aya makipe yombi yagiye guhura Arsenal irusha Man City amanota atatu kuko yari ifite 51 mu gihe City yari ifite 48 byatumye ihita igira 51 maze Man City igahita iyobora urutonde kubera umubare munini w’ibitego imaze gutsinda aho Man City izigamye ibitego 36 kuri 26 bya Arsenal.
Ikipe ya Arsenal ariko ifite amahirwe yo kuba yakongera kwisubiza uyu mwanya wa mbere kuko imaze gukina imikino 22 mu gihe Man City imaze gukina imikino 23.
Ni gake ikipe ya Arsenal ijya itsinda Man City kuko kuva muri 2020 inshuro zose bahuye Arsenal yaratsinzwe.
About The Author
