Umunyamategeko wunganiraga Mukanzabarushimana Marie Chantal ukurikiranyweho uruhare mu rupfu rwa Rutiyomba Akeza Elsie yari abereye mukase, yanze gukomeza kumwunganira.
Iburanisha ry’uru rubanza ryari riteganyijwe kuri uyu wa Kane, tariki ya 9 Gashyantare 2023 mu Rukiko Rwisumbuye rwa Nyarugenge.
Ubwo hatangizwaga iburanisha umunyamategeko we wari imbere y’urukiko yavuze ko uwo yunganira hari amasezerano atubahirije nubwo atavuze ayo ari yo bityo atakomeza kumwunganira.
Umucamanza yabajije Mukanzabarushimana niba yakomeza kuburana atunganiwe arabyanga asaba ko urubanza rwasubikwa kuko atiteguye kuburana adafite umwavoka.
Mukanzabarushimana ntabwo yari yazanywe ku rukiko ahubwo yitabiriye iburanisha hakoreshejwe ikoranabuhanga rya Skype.
Ubushinjacyaha nabwo bwagaragaje ko uregwa ibyo asaba bifite ishingiro ngo kuko afite uburenganzira bwo kuburana afite umwunganira mu mategeko.
Nyuma yo kumva impamvu zatanzwe hasabwe ko rusubikwa, umucamanza yemeza ko ruzasubukurwa ku wa 18 Mata 2023.
Urukiko rw’Ibanze rwa Kagarama rwemeje ko Mukanzabarushimana Marie Chantal afungwa iminsi 30 y’agateganyo muri Werurwe kubera uruhare akurikiranyweho mu rupfu rwa Akeza yari abereye Mukase.
About The Author
