Ikipe ya Kiyovu Sports yamaze guhanishwa kuzakina umukino umwe wa shampiyona nta bafana, izira kuba abafana bayo baheruka gutuka umusifuzi Mukansanga Rhadia Salima.
Ni icyemezo cyafashwe na Komisiyo ishinzwe imyitwarire mu Ishyirahamwe ry’Umupira w’amaguru hano mu Rwanda (FERWAFA).
Ku wa Gatanu tariki ya 20 Mutarama ni bwo Salima yiswe n’abafana ba Kiyovu Sports ’maraya ndetse n’umukecuru’, nyuma yo kutishimira imisifurire ye mu mukino ikipe yabo yaguyemo miswi na Gasogi United 0-0.
Hari mu mukino w’umunsi wa 16 wa shampiyona wabereye kuri Stade ya Bugesera.
Ku wa Kane tariki ya 26 Mutarama ni bwo Komisiyo ishinzwe imyitwarire muri FERWAFA yateranye, mu rwego rwo “gusuzuma ikibazo cy’imyitwarire mibi itesha agaciro yaranze abafana ba Kiyovu Sports” kuri iriya mukino.
Iyi Komisiyo ubwo yateranaga yanatumije ubuyobozi bwa Kiyovu Sports kugira ngo butange ibisobanuro kuri iriya myitwarire y’abafana b’iyo kipe, bwemera koko ko ari “imyitwarire mibi, igayitse kandi idahesha isura nziza ikipe.”
Iyi Komisiyo mu mwanzuro yatangaje kuri uyu wa Mbere tariki ya 30 Mutarama, yavuze ko isanga “harakoreshejwe ibitutsi bigayitse kandi by’ibiterasoni ku musifuzi Mukansanga Rhadia Salima” ku mukino wa Kiyovu Sports na Bugesera FC.
Iyi Komisiyo yanzuye ko Kiyovu Sports yahanishijwe gukina umukino umwe “nta bafana bari ku kibuga”, gusa iha iriya kipe yo ku Mumena uburenganzira bwo kujuririra kiriya cyemezo.
Kiyovu Sports kandi yasabwe kuganiriza amatsinda y’abafana bayo kugira ngo batazongera kurangwa n’imyitwarire mibi kandi igayitse ku kibuga.
Nta gihindutse umukino Kiyovu Sports igomba gukina nta bafana bari ku kibuga ni uw’umunsi wa 20 wa shampiyona izakiramo Marines FC, dore ko imikino ibiri izawubanziriza yose izaba yayisuyemo.
Kiyovu Sports yafatiwe ibihano mu gihe kuri ubu hari abafana batandatu bayo bari gukorwaho iperereza n’Urwego rw’Igihugu rw’Ubugenzacyaha nanone rubakurikiranyeho gutuka Salima.
About The Author
