Ishyirahamwe ry’Umupira w’Amaguru hano mu Rwanda (FERWAFA), ryakuriye inzira ku murima ikipe ya Kiyovu Sports, nyuma y’uko iriregeye APR FC iyishinja gukinisha Lague Byiringiro nyamara atakiri umukinnyi wayo.
Ku wa Gatandatu w’icyumweru gishize APR FC yatsinze Kiyovu Sports ibitego 3-2, mu mukino w’umunsi wa 17 wa shampiyona wabereye kuri Stade Regional ya Muhanga.
Ni umukino wagaragayemo Lague Byiringiro wari mu bakinnyi APR FC yari yabanje mu kibuga, ndetse yanagize uruhare mu gitego Bizimana Yannick yishyuriye iriya kipe y’Ingabo z’Igihugu ku munota wa 20 w’umukino.
Nyuma y’umukino Kiyovu Sports biciye muri Mvukiyehe Juvenal, yandikiye FERWAFA irega APR FC gukinisha Lague, nyamara atakiri umukinnyi wayo bijyanye n’uko ikipe ya Sandvikens IF yemeje ko yamaze kumusinyisha.
Iti: “Umukino waduhuje byagaragaye ko APR FC yakinishije umukinnyi utari uwayo. Dukurikije amakuru tuvana mu ikipe ya Sandvikens IF yo mu gihugu cya Suède aho tariki ya 26 Mutarama 2023 yatangaje kuri Twitter yayo ko Byiringiro Lague ari umukinnyi wa yo byemewe n’amategeko, tukaba dusanga ko ikipe ya APR FC ikwiye kudahabwa amanota y’umukino waduhuje na yo uyu munsi ku wa 28 Mutarama 2023 i Muhanga.”
Kiyovu Sports kandi yanemereye FERWAFA kuyigaragariza urutonde rugaragaza ko Lague ari umukinnyi wa Sandvikens IF, ikavuga ko yatunguwe cyane ’no kubona anagaragara ku rutonde rw’abakinnyi ba APR FC ndetse akaba yakinnye uwo mukino.”
Umunyamabanga Mukuru wa FERWAFA, Muhire Henry, yabwiye Radio Rwanda ko Byiringiro Lague bakimufata nk’umukinnyi wa APR FC.
Ati: “Ku giti cyacu iyo umukinnyi atarasabirwa uburenganzira bumuvana mu kipe bumujyana mu yindi icyo gihe ibisigaye byose biba ari amakuru mu by’ukuri… Ubu nonaha mu buryo bwemewe icyo nababwira ni uko umukinnyi Byiringiro Lague ni umukinnyi w’ikipe ya APR FC dukurikije amakuru ari imbere yacu.”
Umunyamabanga Mukuru wa FERWAFA yasobanuye ko ririya shyirahamwe ritagendera ku byatangajwe na Sandvikens ngo ryemeze ko Lague ari umukinnyi wayo, bijyanye no kuba iriya kipe yo muri Suède itaramusabira ibyangombwa bimuvana muri FERWAFA bimujyana muri Suède.
Yunzemo kandi ko hari n’ibindi bisabwa bigomba kuzuzwa kugira ngo Lague Byiringiro abe umukinnyi wa Sandvikens, birimo amasezerano y’akazi, ibyerekana ko yasoje amasezerano muri APR FC ndetse na release letter yerekana ko yarekuwe na APR FC.
Yavuze ko mu gihe ibi byose bitaratungana Lague akiri umukinnyi wa APR FC.
Muhire yanibukije ko kuba isoko ryo kugura abakinnyi mu Rwanda ryarafunze imiryango bidasobanuye ko hari abakinnyi bagomba kuva mu makipe yo mu Rwanda berekeza mu mahanga, bijyanye no kuba hari ibihugu isoko rigifunguye.
About The Author
