Abantu 18 barimo Minisitiri w’Umutekano w’imbere muri Ukraine, baguye mu mpanuka ya kajugujugu yabereye hafi y’i Kiev mu gitondo cyo kuri uyu wa Gatatu.
Ibiro Ntaramakuru by’Abafaransa (AFP) byatangaje ko iyi mpanuka yabereye mu gace ka Brovary, hafi y’ubusitani abana bakiniramo hakaba n’igorofa ryo guturamo.
Uretse Minisitiri Denys Monastyrsky w’imyaka 42 waguye muri iriya mpanuka, abandi bayipfiriyemo barimo Ievgueni Ienine wari umwungirije ndetse n’undi muyobozi muri iriya Minisiteri.
Iriya mpanuka kandi yaguyemo abana batatu nk’uko itangazo rya Polisi ya Ukraine ribivuga.
Usibye abaguye muri iriya mpanuka, hari kandi abantu 29 bayikomerekeyemo.
Nyuma y’iyi mpanuka, benshi bakomeje gushyira mu majwi Leta y’Uburusiya ko ishobora kuba yihishe inyuma y’iyi mpanuka y’indege dore ko yari irimo umuyobozi ukomeye mu by’umutekano wa Ukraine ikomeje kuyigora mu ntambara ibihugu byombi bimaze hafi umwaka bihanganiyemo.
About The Author
