Urukiko rw’Ubujurire rwatangiye kuburanisha urubanza rw’ubujurire rwa Ladislas Ntaganzwa wahoze ari Bourgmestre wa Komini ya Nyakizu ubu ni mu karere ka Nyaruguru wahamwe n’icyaha cyo gukora Jenoside yakorewe Abatutsi mu 1994.
Yaburanishijwe ku rwego rwa mbere n’Urukiko Rukuru rushinzwe kuburanisha ibyaha mpuzamahanga i Nyanza maze akatirwa gufungwa burundu mu 2020, afata icyemezo cyo kujurira. Ntaganzwa, ufite imyaka 60, yari yahamijwe ibyaha bya jenoside, gushishikariza gukora jenoside, ubwicanyi, no gufata ku ngufu.
Araregwa kuba yarateguye ubwicanyi bwakorewe Abatutsi i Nyakizu, komini yayoboye, barimo 25.000 biciwe kuri Paruwasi Gatolika ya Cyahinda aho bari bagiye gushaka ubuhungiro.
Mu rubanza rwa mbere, abatangabuhamya benshi bamushinje uruhare runini yagize mu gitero cyo kuri Kiliziya Gatolika ya Cyahinda cyarimo abapolisi, abasirikare (bazanywe aho hantu na Ntaganzwa), imitwe yitwara gisirikare, n’impunzi z’Abarundi.
Ntagazwa yatawe muri yombi muri 2015 afatiwe muri Repubulika ya Demokarasi ya Congo maze yoherezwa mu Rwanda mu 2016.
Yari umwe mu bantu icyenda baregwaga n’Urukiko Mpuzamahanga Mpanabyaha rwashyiriweho u Rwanda (ICTR) ariko yari atarafatwa igihe uru rukiko rwafungaga muri 2015.
About The Author
