Nyuma y’uko ibiganiro bitagenze neza hagati ya Kiyovu Sports n’umutoza w’Umubiligi Patrick Aussems, ubu iyi kipe ihanze amaso kuri Mwinyi Zahera wo muri repubulika ya demokarasi ya Congo ngo abe yaza kuyitoza.
Umunyamabanga wa Kiyovu Sports, Munyangabe Omar aherutse kwemerera ISIMBI ko iyi kipe iri mu biganiro na Patrick Aussems ngo abe yaza gutoza iyi kipe yatandukanye na Haringingo Francis, ni nyuma y’ifoto ya Aussems na perezida wa Kiyovu Sports, Mvukiyehe Juvenal yagiye hanze ndetse akaba hari na bo yari yemereye ko bamaze kumvikana.
Ibi byaje gukomwa mu nkokora na AFC Leopards asanzwe atoza yemeye kumwishyura ibirarane bari bamurimo na we akaba yahise yemera gukomeza akazi ndetse umunyamabanga w’iyi kipe yabwiye igitangazamakuru cya Citizens ko mu minsi mike aba yageze muri Kenya.
Gilbert Andugu ati “Yamaze kubona itike y’indege kuva uyu munsi igihe icyo aricyo cyose yaza kuko ku wa 12 Kanama azaba ari kumwe natwe hano. Kuri uyu wa kabiri nibwo tuzasohora ingengabihe y’uko imyiteguro yo gutangira shampiyona izagenda.”
Amakuru avuga ko Kiyovu Sports nyuma yo kubona ko kuri Aussems Patrick bidakunze, amaso yahise iyerekeza kuri Mwinyi Zahera ukomoka muri DR Congo watoje amakipe arimo Yanga yo muri Tanzania.
About The Author
