Urukiko rw’Ibanze rwa Kicukiro kuri uyu wa Gatanu, rwategetse ko abakozi ba FERWAFA bari bafunzwe bakurikiranyweho ibyaha bifitanye isano na ruswa barekurwa bagakurikiranwa badafunze.
Aba ni Nzeyimana Félix wahoze ashinzwe amarushanwa n’umusifuzi witwaTuyisenge Javan. Bombi bari bamaze igihe bafunzwe bakurikiranyweho ibyaha bitatu bifitanye isano ruswa.
FERWAFA ni yo yari yarabaregeye RIB kubera uruhare bakekwagaho mu karengane kari karakorewe ikipe ya Rwamagana City, ubwo yaterwaga mpaga na AS Muhanga ishinjwa gukinisha umukinnyi ufite amakarita atatu y’umuhondo.
Rwamagana cyakora cyo yarajuriye birangira irenganuwe, ndetse inazamuka mu cyiciro cya mbere.
Mu ntangiriro z’iki cyumweru ni bwo Nzeyimana na Tuyisenge baburanye ku ifunga n’ifungurwa ry’agateganyo, mbere y’uko kuri uyu wa Gatanu basomerwa umwanzuro.
Urukiko rwategetse ko baburana bari hanze. Nzeyimana yarekuwe mu gihe FERWAFA yamaze kumwirukana kubera ibimenyetso byagaragaye asaba umusifuzi Javan guhindura raporo amwizeza ko nibicamo azamureba.
About The Author
