Ikipe ikunzwe n’abatari bake hano mu Rwanda ndetse no hanze yarwo, izambara umwambaro wayo uzaba uriho abaterankunga benshi batandukanye dore ko hari n’abandi bakiri mu biganiro n’iyi kipe ku buryo umwaka w’imikino wa 2022-2023, iyi kipe izaba yambaye umwambaro utatse miliyoni zirenga 600.
Amakuru ahari ni uko umwaka utaha w’imikino wa 2022-23 Rayon Sports izaba ikorana n’abaterankunga bagera kuri batanu (5) ndetse bose izaba yamamaza ku myambaro yayo.
Nk’ibisanzwe izaba yambara umuterankunga mukuru ari we Skol mu gatuza aho baheruka kuvugurura amasezerano aho izishyurwa arenga miliyari ku myaka 3 ariko uyu mwaka hazakurikizwa amasezerano yari asanzwe ya miliyoni 200 ku mwaka.
Ku kuboko izaba yamamaza Ubukerarugendo bw’Akarere ka Nyanza (Royal Nyanza) aho izishyurwa miliyoni 100 ku mwaka. Rayon Sports kandi izambara Canal+ ku ikabutura, iyi kipe ikaba izahabwa miliyoni 65 ku mwaka.
Mu minsi ya vuba kandi iyi kipe ya Rayon Sports izasinyana n’umuterankunga izajya yambara ku mupira hejuru y’izina na nimero (mu mugongo), uyu azajya yishyura miliyoni 200 ku mwaka. Iyi kipe kandi ngo yanamze kubona umuterankunga wa miliyoni 60 izambara munsi ya nimero y’umupira, amakuru avuga ko ari ’Tembera u Rwanda’.
Rayon Sports kandi irimo ishakisha umuterankunga izajya yambara ku kibuno, ku ikabutura. Ibi ariko bikazajyana no kwamamaza aba bafatanyabikorwa ku mikino Rayon Sports yakiriye.
Nubwo iyi kipe ariko ikomeje gushaka abafatanyabikorwa batandukanye, benshi mu bakunzi bayo bakomeje kuyishinja gusinzira muri iki gihe amakipe ari kwiyubaka agura abakinnyi aho bayishinja kuba itari kugura abakinnyi bakomeye.
About The Author
