Ikipe ya APR FC bivugwa ko yifuza gusinyisha rutahizamu Meddie Kagere usanzwe akinira Simba Sports Club yo muri Tanzania, gusa amakuru avuga ko uyu mukinnyi ari kubigenza gake.
APR FC bivugwa ko yamaze gusinyisha abarimo Niyigena Clément wakiniraga Rayon Sports, Uwiduhaye Abouba wakiniraga Police FC, Ndikumana Fabio wakiniraga Musanze FC, Ishimwe Christian na Niyibizi Ramadhan bakiniraga AS Kigali cyo kimwe na Ishimwe Fiston wakiniraga Marines FC.
Hari andi makuru avuga ko APR FC yaba yatangiye kugirana ibiganiro na rutahizamu Meddie Kagere usoje amasezerano muri Simba, gusa akaba akomeje kugora iyi kipe. Ngo ni ku mpamvu y’uko hari andi makipe yo muri Tanzania na Kenya amwifuza, ndetse akaba yiteguye kumutangaho amafaranga aruta ayo APR FC iri kumuha.
Mu minsi ishize byavugwaga ko ikipe ya APR FC yifuzaga kumusinyisha amasezerano y’umwaka umwe ikamugura miliyoni 15 z’Amanyarwanda n’umushahara wa miliyoni ebyiri buri kwezi.
Kagere w’imyaka 36 y’amavuko yagize ibihe byiza mu makipe atandukanye hano mu Rwanda, arimo Mukura VS, Atraco FC, Rayon Sports na Police FC. Ni umwe muri ba rutahizamu bagifite ijambo rikomeye hano mu Rwanda n’ubwo hari abavuga ko akuze cyane.
About The Author
