Kuri uyu wa Gatanu, Perezida Paul Kagame yakiriye mugenzi we Perezida Yoweri Kaguta Museveni w’igihugu cya Uganda uri mu bakuru b’ibihugu na za Guverinoma bitabiriye inama ya CHOGM 2022.
Perezida Kagame yakiriye Museveni muri Kigali Conversation Center, ubwo yatangizaga inama y’Umuryango wa Commonwealth. Ni inama yitabiriwe n’abakuru b’ibihugu na za Guverinoma 54 zigize uriya muryango.
Perezida Kagame yakiriye Museveni ari kumwe n’Umunyamabanga Mukuru wa Commonwealth, Rt. Hon Patricia Scotland.
Museveni yakoze agashya ko kuba ari we rukumbi wari wambaye agapfukamunwa mu bakuru b’ibihugu na za Guverinoma 54 bitabiriye umuhango wo gutangiza iriya nama, ibigaragaza ko we agifata icyorezo cya COVID-19 nk’ikigiteye inkeke.
Ku munsi w’ejo ni bwo Perezida Yoweri Museveni yageze hano mu Rwanda aciye i Gatuna, yakiranwa ubwuzu n’urugwiro rudasanzwe.
Byari nyuma y’imyaka itanu atahagera kubera umwuka mubi wari hagati ye n’igihugu cy’u Rwanda. Museveni nyuma yo kugera hano mu Rwanda yashimye Abanyarwanda ku bw’urugwiro bamugaragarije. Biteganyijwe ko Perezida Museveni agomba kumara i Kigali iminsi ine mbere yo gusubira muri Uganda.
About The Author
