Urwego rw’Igihugu rw’Ubugenzacyaha RIB rwashyikirije Ubushinjacyaha dosiye ya Miss Iradukunda Elsa na Notaire Uwitonze Nasira bakurikiranyweho ibyaha bitatu birimo icyo gutanga ubuhamya bw’ibinyoma.
Ku wa Gatanu tariki 13 Gicurasi 2022 nibwo dosiye y’abaregwa yashyikirijwe urukiko. Mu byaha bakurikiranyweho harimo icyo gutanga ubuhamya bw’ibinyoma. Amategeko agena ko uwagikoze abigambiriye iyo kimuhamye ahanishwa igifungo kitari munsi y’umwaka umwe ariko kitarenze imyaka itatu n’ihazabu y’ibihumbi 500 Frw ariko itarenze miliyoni imwe.
Ikindi cyaha bakurikiranyweho ni ukoshya abitabajwe mu nzego z’ubutabera.
Cyo iyo umuntu agihamijwe n’urukiko, ahanishwa igifungo kitari munsi y’umwaka umwe ariko kitarenze imyaka ibiri n’ihazabu itari munsi y’ibihumbi 500 Frw ariko itarenze miriyoni.
Ikindi cyaha bakurikiranyweho ni uguhimba, guhindura inyandiko cyangwa gukoresha inyandiko mpimbano. Kibahamye, bahanishwa igifungo kitari munsi y’imyaka itanu ariko kitarenze imyaka irindwi n’ihazabu y’amafaranga atari munsi ya 3 000 000 Frw ariko atarenga 5 000 000 Frw cyangwa kimwe gusa muri ibyo bihano.
Aba bombi batawe muri yombi mu gihe Ishimwe Dieudonne uzwi nka Prince Kid yari yatawe muri yombi akekwaho ibyaha bijyanye n’ihohotera rishingiye ku gitsina yakoreye bamwe mu bakobwa bitabiriye Miss Rwanda mu myaka itandukanye.
About The Author
