Ikipe yo mu karere ka Gicumbi iri mu makipe amaze igihe kinini ku wanya wa nyuma muri shampiyona y’ikiciro cya mbere mu Rwanda, yahagamye ikipe ya Rayon Sports ubwo banganyaga ibitego 2-2 mu mukino w’umunsi wa 26 wa shampiyona.
Iyi kipe mu Karere ka Gicumbi, yaherukaga kubona inota tariki 20 Werurwe 2022 ubwo yanganyaga na Police FC igitego 1-1 i Gicumbi. Gusa kuri uyu wa gatandatu ikipe ya Gicumbi Fc yakuye inota rimwe kuri Rayon Sports.
Ibitego byose bya Rayon Sports byatsinzwe na Essomba Willy Onana ku munota wa 27 na 41 mu gihe ibya Gicumbi FC byatsinzwe na Malanda Destin ku munota wa 33 na 51.
Abakinnyi ba Rayon Sports bahuye n’imibare igoye yaturutse ku ivunika rya Hakizimana Adolphe wari mu izamu kimwe na Mael Ndindjek ukina ataha izamu.
Abakinnyi ba Gicumbi FC bakinaga basa n’abadafite icyo baramira kuko amahirwe menshi bazi ko ikipe bakinira izamanuka mu cyiciro cya kabiri.
Bamwe mu bakinnyi ba Rayon Sports bari baruhukijwe kugira ngo bitegure neza umukino ubanza wa ½ cy’irangiza mu gikombe cy’Amahoro uzabahuza na APR FC kuwa 11 Gicurasi 2022.
Magingo aya, Rayon Sports ifite amanota 43 mu mikino 26 imaze gukinwa, biyishyira ku mwanya wa kane muri shampiyona y’uyu mwaka w’imikino wa 2021-2022.
About The Author
