Ikipe yo mu gihugu cy’Ubwongereza Liverpool yabaye ikipe ya mbere igeze ku mukino wa nyuma wa UEFA Champions y’uyu mwaka, nyuma yo gutsinda Villarreal ibitego 3-2 ikayisezerera ku giteranyo cy’ibitego 5-2.
Iyi kipe y’umutoza Jürgen Klopp yari yasuye Villarreal ya Unai Emery kuri Estadio de la Ceramica mu mukino wo kwishyura wa 1/2 cy’irangiza, nyuma y’ubanza wo mu cyumweru gishize Liverpool yari yaratsindiyemo ibitego 2-0 mu cyumweru gishize.
Byasabye ko Liverpool yabanjwe ibitego 2-0 mu gice cya mbere cy’umukino itsinda iturutse inyuma kugira ngo yongere kugera ku mukino wa nyuma wa Champions league yaherukagaho mu myaka ibiri ishize.
Umunota wa gatatu w’umukino wari uhagije ngo Villarreal ifungure amazamu ibifashijwemo na rutahizamu Boulaye Dia, mbere y’uko Francis Coquelin ayitsindira igitego cya kabiri ku munota wa 41 n’umutwe.
Byasabye Liverpool gukoresha imbaraga z’umurengera mu gice cya kabiri cy’umukino kugira ngo igaruke mu mukino, yishyura ibitego bibiri yari yatsinzwe ndetse inashobora no kubona icya gatatu cy’intsinzi. Igice cya kabiri cy’umukino kigitangira umutoza Klopp yakoze impinduka zahise zitangira gutanga umusaruro, nyuma yo kuvana mu kibuga Diogo Jota agaha umwanya Luis Diaz.
Byasabye umunota wa 62 w’umukino ngo Liverpool yishyure kimwe mu bitego yari yatsinzwe ibifashijwemo na Fabinho, ku ishoti yarekuye rikaruhukira mu izamu rya Geronimo Rulli. Liverpool yatsinze igitego cya kabiri ku munota wa 67 biciye kuri Diaz wari uhinduriwe umupira na Trent, mbere y’uko Sadio Mané atsinda agashinguracumu ku munota wa 74 w’umukino.
Villarreal yasoje uyu mukino ifite abakinnyi 10 mu kibuga, nyuma y’ikarita itukura yeretswe Etienne Capoué, nyuma yo gukorera ikosa kuri Curtis Jones akerekwa ikarita ya kabiri y’umuhondo.
Gusezerera Villarreal byatumye Liverpool ifite ibikombe bitandatu bya UEFA Champions league igera ku mukino wa nyuma w’iri rushanwa ku ncuro yayo ya cumi, by’umwihariko inaba ikipe ya mbere yo mu Bwongereza igeze ku mukino wa nyuma wa UEFA Champions league, FA Cup na Carabao Cup mu mwaka umwe.
Umutoza Jürgen Klopp we yabaye uwa gatatu ugeze ku mukino wa nyuma wa UEFA Champions league ku ncuro ya kane, nyuma ya Sir Alex Ferguson na Carlo Ancelotti, gusa Pep Guardiola na we ashobora kubiyongeraho mu gihe Man City yaba isezereye Real Madrid.
Iyi kipe y’umutoza Klopp iramenya uwo bazahurira ku mukino wa nyuma kuri uyu wa Gatatu, nyuma y’umukino wo kwishyura wa 1/2 cy’irangiza Real Madrid yakiramo Manchester City yayitsinze ibitego 4-3 mu mukino ubanza
About The Author
