Ishyirahamwe ry’Umupira w’Amaguru ku Isi, FIFA ryafatiye ibihano amashyirahamwe y’umupira w’amaguru mu bihugu bitandatu by’Afurika nyuma y’imikino ya nyuma y’amajonjora y’Igikombe cy’Isi.
FIFA kandi yatesheje agaciro ubusabe bwa Misiri na Algerie byari byasabye ko imikino yabaye hagati y’abo n’uwa Senegal na Cameroon isubirwamo. Senegal, Nigeria na Repubulika Iharanira Demokarasi ya Congo byahanishijwe gukina umukino umwe nta bafana bitabiriye. Senegal yahanishijwe gukina umukino umwe nta bafana bari ku kibuga, banacibwa amafaranga arenga miliyoni 180 Frw, kubera uburyo abafana bitwaye mu mukino wo kwishyura wabahuje na Misiri.
Mu byo FIFA yabahaniye harimo kunanirwa kubahiriza amategeko n’amabwiriza muri sitade abafana binjira mu kibuga, kujugunya ibikoresho, gucana ibikoresho bizwi nka ‘fire works’ n’amatara ya laser pointers ahumisha abakinnyi, no gukwirakwiza ubutumwa busesereza.
Ishyirahamwe ry’umupira w’amaguru rya Misiri ryo ryahanishijwe amafaranga asaga miliyoni 6 Frw, nyuma y’aho umusifuzi yihanangirije abantu batandatu bari bagize ikipe ya Misiri.
Repubulika Iharanira Demokarasi ya Congo yo yahanishijwe gukina umukino umwe nta bafana bari ku kibuga n’amande y’amafaranga asaga miliyoni 123 Frw kubera kwiroha mu kibuga kw’abafana mu mukino ubanza banganyirijemo na Maroc ibitego 3-3.
Congo yaciwe andi asaga miliyoni 5Frw kubera kujugunya ibikoresho mu kibuga mu mukino wo kwishyura w’amajonjora batsindiwemo na Maroc ibitego 4-1.
Maroc yo yahanishijwe amande y’asaga miliyoni 30 Frw kubera gucana ibikoresho bya ‘fire works’, kujugunya ibikoresho no gufunga inzira zinjira muri sitade mu mukino wo kwishyura wabahuje na Congo.
Ishyirahamwe ry’umupira w’amaguru muri Algérie ryari ryasabye ko umukino w’abo na Cameroun usubirwamo kubera ibyemezo byafashe n’umusifuzi Bakary Gasama bavuga ko byatumye basezererwa.
FIFA yabahanishije amande y’asaga miliyoni 3 Frw, kubera guteza umutekano muke ku kibuga, bacana fireworks no kujugunya ibikoresho mu kibuga. Nigeria yo yahanishijwe asaga miliyoni 154 Frw no gukina umukino umwe nta bafana ku kibuga nyuma y’aho abafana biroshye mu kibuga bakangiza ibikoresho bya sitade mu mukino wo kwishyura wabereye Abuja batsinzwemo na Ghana.
About The Author
