Umuyoboro (channel) w’umuhanzi Diamond Platnumz wamamaye mu muziki wa Tanzania wakuwe burundu ku rubuga rwa YouTube guhera kuri uyu wa 25 Mata 2022, indirimbo yakoranye n’Umunyarwanda The Ben ibigenderamo.
Abanyamakuru bakomeye mu myidagaduro muri Tanzania basobanura ko ubwo uyu muyoboro wari umaze gukurwa kuri YouTube hagaragaraga ubutumwa busobanura impamvu.
Uwasuraga uyu muyoboro yawubonaga, ariko nta ndirimbo n’imwe mu zo uyu muhanzi yashyizeho zihagaragara. Muri uwo mwanya, hagaragaraga ubutumwa bugira buti: “Iyi konte yakuweho burundu (terminated) kubera ko yishe amabwiriza agenga umuryango wa YouTube.”
Kuri ubu, uwandika amazina ‘Diamond Platnumz’ ntashobora kugera ku muyoboro w’uyu muhanzi, ndetse n’uwashaka indirimbo ze zitandukanye, zaba ize bwite n’izo yafatanyije na bagenzi be nta cyo abona.
Mu ndirimbo Diamond yafatanyije n’abahanzi harimo iye Mugisha Benjamin uzwi nka The Ben yitwa ‘Why’, yari yarashyizwe kuri uyu muyoboro muri Mutarama 2022.
Uyu muyoboro ukuwe kuri YouTube wari umaze kugira abawukurikira mu buryo buhoraho (subscribers) miliyoni zirenga 6.5, bakaba ari bo benshi kurusha iy’abandi bahanzi bose bo muri Afurika y’iburasirazuba.
Uyu muhanzi w’icyamamare muri Tanzaniya no muri Afurika, Diamond Platnumz ntacyo aratangaza ku cyemezo YouTube yafatiye umuyoboro we.
About The Author
