Perezida wa Repubulika ya Ukraine, Volodymyr Zelensky yatangaje ko urwego rw’umutekano rwa SBU rwataye muri yombi umunyapolitiki ukomeye, Viktor Medvedchuk ukekwaho kugambanira igihugu, akorana n’ingabo z’u Burusiya zikomeje kugaba ibitero.
Perezida Zelensky kuri uyu wa 12 Mata 2022 yashyize hanze ifoto ya Medvedchuk yambaye impuzankano y’igisirikare cya Ukraine, n’amapingu. Ubutumwa yashyize ku rubuga rwa Facebook ku ifatwa ry’uyu munyapolitiki bugira buti: “Operasiyo idasanzwe yakozwe na SBU. Mwakoze neza. Amakuru arambuye arakurikiraho. Ikuzo kuri Ukraine.”
Nyuma y’amasaha agera kuri ane, Perezida Zelensky yasobanuye ko Medvedchuk usanzwe ari Umurusiya yafashwe yambaye impuzankano y’igisirikare kandi atari umusirikare. Ati: “Niba Medvedchuk yihitiyemo impuzankano y’igisirikare, yagonzwe n’amategeko y’ibihe by’intambara.”
Uyu Mukuru w’Igihugu yasabye u Burusiya ko bwarekura abasirikare ba Ukraine bwagize imbohe, kugira ngo na Medvedchuk arekurwe. Ati: “Ndasaba u Burusiya ko bwaduha abahungu n’abakobwa bacu, natwe tukabushyikiriza uyu muntu.”
About The Author
