Minisitiri w’Ubutegetsi bw’Igihugu, Gatabazi Jean Marie Vianney, yagaragaje ko nta kibazo abona mu kuba yagaragaje ko ashyigikiye Miss Uwase Divine Muheto, bijyanye no kuba amatora ya Miss Rwanda atari ay’inzego z’ibanze yemwe akaba ntaho ahuriye na Minisiteri y’Ubutegetsi bw’Igihugu akuriye.
Mu rukerera rwo kuri iki Cyumweru ni bwo Muheto yegukanye ikamba rya Nyampinga w’u Rwanda wa 2022, ahigitse abakobwa 19 bari barihataniye. Mbere y’uko Nyampinga mushya w’u Rwanda amenyekana Minisitiri Gatabazi yari yanditse kuri Twitter ye agaragaza ko ashyigikiye uriya mukobwa wahabwaga na benshi amahirwe yo kwegukana ririya kamba.
Ati: “Muheto ni we nkunda.“
Ni amagambo atakiriwe na bamwe mu bakoresha imbuga nkoranyambaga, bamwe babwira Minisitiri Gatabazi ko imvugo ye ishobora kugira uruhare mu byemezo by’abari bagize akanama nkemurampaka.
Umunyamakuru Mutuyeyezu Oswald ’Oswakim’ ni umwe mu batanze ibitekerezo ku butumwa bwa Minisitiri Gatabazi, ati: “Ushobora kugira uruhare mu mwanzuro w’akanama nkemurampaka. Wibuke ko uri Minisitiri.”
Uwitwa Julius Justin we yagize ati: “Imvugo nk’iyi kuri Minisitiri w’Ubutegetsi bw’Igihugu? Ibi byafatwa nko ku influencinga judges! Ibaze nka Perezida na we avuze abo ashyigikiye (uretse ko we atabikora). Unfortunately, imirimo yanyu ntibimerera kugaragaza aho muhengamiye! Cyereka ari igihugu ku kindi!”
Uwitwa Rudakangarwa kuri Twitter we yabwiye Minisitiri Gatabazi ko “kuba uri minister ntibivuze ko ugomba kwivanga muri ibi bintu, rwose rebana n’ibindi bibazo byabaturage. Murakoze!“
Cyakora n’ubwo hari benshi bagiye bibasira Minisitiri Gatabazi, hari n’abamushyigikiye bavuga ko nk’umuntu afite uburenganzira bwo kugaragaza uruhande ahagazeho. Gatabazi mu butumwa yanditse kuri Twitter asubiza umwe mu banenze abamwibasiye, yavuze ko nta kibazo abona mu kuba yatangaje ko ashyigikiye Miss Muheto.
Ati: “Ariko se igitangaza kiri hehe? Ko atari amatora y’inzego z’ibanze kdi ntibibe mu nshingano za Minaloc, ikindi najye nkaba umuntu? Ikibazo kiri he?“
Miss Muheto Minisitiri Gatabazi yari ashyigikiye yegukanye ikamba rya Miss Rwanda 2022 asimbuye Ingabire Grace wari ufite iry’umwaka ushize.
About The Author
