Umugaba w’Ingabo za Uganda zirwanira ku butaka, Lt Gen Muhoozi Kainerugaba, ku gicamunsi cyo kuri uyu wa Kabiri yasuye inyubako ya Kigali Arena agaragara akina Basketball.
Uyu mugabo usanzwe ari umuhungu wa Perezida Yoweri Museveni yageze i Kigali ejo ku wa Mbere. Yaherukaga muri uyu murwa mukuru w’u Rwanda ku wa 22 Mutarama 2022.
Ku mugoroba w’ejo Muhoozi yongeye kugirana ibiganiro na Perezida Paul Kagame byibanze ku mubano w’u Rwanda na Uganda. Ku munsi wa kabiri w’uruzinduko rwe hano mu Rwanda, Gen Muhoozi Kainerugaba yasuye inyubako ya Kigali Arena azerenguka ibice bitandukanye biyigize.
Amafoto yashyizwe ku rubuga rw’iyi nyubako rwerekana uyu musirikare wari uherekejwe n’abayobozi batandukanye barimo abo mu ngabo z’u Rwanda agerageza gushyira umupira mu nkangara. Mu gitondo cyo kuri uyu wa Kabiri bwo Lt Gen Muhoozi Kainerugaba yasuye Urwibutso rwa Jenoside rwa Kigali ruri ku Gisozi, yunamira imibiri y’Abatutsi barenga ibihumbi 250 iruruhukiyemo.
Gen Muhoozi mu butumwa yanditse mu gitabo cy’abasura ruriya rwibutso, yavuze ko yababajwe cyane n’ibyo yahabonye.
Ati: “Mbabajwe nibyo mbonye kuri uru rwibutso rwa Jenoside yakorewe abaturage b’iki gihugu mu mwaka wa 1994.”
Yunzemo ati: “Ndashima ubuyobozi bw’iki gihugu buyobowe na Nyakubabwa Paul Kagame bwatekereje kubaka uru rwibutso kugira ngo abazavuga ejo hazaza batazasubira mu makosa yakozwe n’abababanjirije.”
About The Author
