Benshi mu bumvise iyi nkuru bwa mbere ko mu Rwanda hagiye kuba amarushanwa y’Ubwiza ku basore yaguye mu kantu ariko agira amatsiko yuko bizaba bimeze ubwo bazaba biyerekana ndetse n’uzatwara iri kamba rya Mister Rwanda 2022, ni mu gihe hari hamenyerewe Miss Rwanda.
Amajonjora y’irushanwa ryo gushakisha Rudasumbwa mu basore [Mr Rwanda 2022] agiye gutangira mu Ntara y’Iburasirazuba.
Kuri uyu wa Gatatu tariki 2 Werurwe 2022, kompanyi Imanzi Ltd iri gutegura irushanwa rya Mr Rwanda yatangaje ko kuva tariki 25 Werurwe 2022 izakora amajonjora yo gushakisha umusore uzambikwa ikamba rya Mr Rwanda 2022.
Umuyobozi wa Imanzi Ltd, Byiringiro Moses yatangarije Inyarwanda ko uko iminsi ishira bari kugenda babona abaterankunga bashyigikiye iri rushanwa. Avuga ko mu rwego rwo kujyanisha n’umuco, umusore uzatsinda n’ibisonga bye buri umwe azahabwa inka wongeyeho n’ibindi bihembo byatangajwe.
Byiringiro ati “Mu bihembo twatangaje twongeyemo ko umusore uzatsinda n’ibisonga bye tuzabaha inka. Tukamuha inka n’abandi babiri bamugaragiye, ubwo ni inka eshatu.”
Yavuze ko batekereje guha inka abasore batatu bazatsinda ‘kubera ko inka ifite ubusobanuro bugari mu muco w’u Rwanda’.
Yavuze ko amajonjora ya mbere azaba ku wa 25 Werurwe 2022 mu Karere ka Rwamagana mu Ntara y’Iburasirazuba; ku wa 26 Werurwe 2022 amajonjora azabera mu Karere ka Musanze mu Ntara y’Amajyaruguru.
Ku wa 27 Werurwe 2022 amajonjora azakomereza mu Karere ka Rubavu mu Burengerazuba, ku wa 29 Werurwe 2022 amajonjora azabera mu Karere ka Huye mu Ntara y’Amajyepfo, amajonjora azarangirira mu Mujyi wa Kigali ku wa 30 Werurwe 2022.
Umusore uzegukana ikamba rya Mister Rwanda azahabwa imodoka ifite agaciro ka miliyoni 10 Frw n’inzu yo kubamo mu gihe cy’umwaka umwe. Azahabwa kandi internet yo gukoresha mu gihe cy’umwaka azahabwa na Mango 4G, ndetse azanahembwa ‘smart phone’ na Mango 4G.
Igisonga cya mbere [1st Runner Up] azahabwa internet azakoresha mu mwaka na Mango 4G ahabwe na ‘router’ imufasha kubona internet. Igisonga cya kabiri [2nd Runner Up] nawe azahabwa internet azakoresha mu gihe cy’umwaka umwe na ‘router’.
Umusore ukunzwe mu irushanwa [Mister Popularity] azahembwa internet y’umwaka ndetse na ‘Smart Phone’ izatangwa na Mango 4G.
Iri rushanwa rya Rudasumbwa rigiye kuba mu Rwanda ku nshuro yaryo ya mbere aho abagera kuri 701 ari bo bamaze kwiyandikisha ku kuzaryitabira. Abamaze kumenyekana biyandikishije basanzwe bazwi harimo uzwi nka Super Manager ndetse n’umugabo wa Mukaperezida.
About The Author
