Ahagana saa Cyenda z’ijoro rishyira kuri iki Cyumweru, tariki 16 Mutarama 2022, inzego z’umutekano mu Karere ka Rwamagana zarashe umusore w’imyaka 22 nyuma yuko ashatse kuzirwanya.
Uyu musore yarashwe ubwo yari afashwe yuriye imodoka, ari gupakurura amakaro yari ihetse, yasabwa kubihagarika akarwanya inzego z’umutekano aribwo bafashe icyemezo cyo kumurasa agahita ashiramo umwuka.
Meya w’Akarere ka Rwamagana, Mbonyumuvunyi Radjab, yatangaje ko byabereye mu Kagari ka Ntunga mu Murenge wa Mwulire aho yahamije ko uyu musore koko yashatse kurwanya abashinzwe umutekano na bo bahita bamurasa mu rwego rwo kwitabara.
Yaboneyeho kandi gushishikariza abaturage kwirinda ingeso mbi zirimo ubujura bwitwikiriye ijoro kuko inzego z’umutekano zitazihanganira abantu nk’abo.
Kuri ubu umusore warashwe yahise yitaba Imana mu gihe inzego zibishinzwe zatangiye iperereza kuri iri raswa ry’uyu musore.
About The Author
