Repubulika Iharanira Demokarasi ya Congo irashinja inyeshyamba zo mu mutwe wa M23 kurasa ku ngabo zayo zikoresheje drones z’ubwiyahuzi zizwi nka Kamikaze; ikaba imwe mu mpamvu zikomeje gukubitwa ahababaza.
Ni ibyatangajwe na Minisitiri ushinzwe iterambere ry’icyaro, Muhindo Nzangi, mu kiganiro yaraye agiranye n’abanyamakuru.
Uyu ubwo yasubizaga ikibazo cy’umwe mu banyamakuru, yemeye ko FARDC ikomeje kwamburwa na M23 uduce two muri Teritwari ya Lubero; bitandukanye n’ibitangazwa n’Igisirikare cya Congo.
Nzangi yavuze ko kimwe mu bikomeje gutuma M23 yirukansa FARDC ari uko iri gukoresha drones za Kamikaze.
Yagize ati: “Inyeshyamba za M23 zakoresheje drones za Kamikaze mu gupasura imirongo y’ubwirinzi y’ingabo za Congo, bituma ingabo zacu zisubira inyuma.”
Nzangi yunzemo ati: “Ingabo zacu zimaze ibyumweru bibiri zigabwaho ibitero n’Igisirikare cy’u Rwanda, M23 na AFC muri Lubero na Walikale… Ingabo zacu mu muhate wazo ukomeye wo kubahiriza umuhate mpuzamahanga zahugiye gusa mu kwirwanaho, zanga kwica ibikubiye mu nama ya Luanda; ariko ku munsi wa mbere w’ubushotoranyi M23 yahawe isomo ry’intangarugero.”
Kugeza ubu ntacyo Igisirikare cya RDC kiravuga ku byatangajwe n’uriya Minisitiri.
Icyakora amakuru ataragira uruhande ruyemeza aravuga ko M23 yaba iri gukoresha muri Lubero drones zirasa amasasu zizwi nka quadcopter zimaze igihe zikoreshwa mu ntambara yo muri Ukraine.
About The Author
