Iyi kipe isanzwe ifashwa n’Akarere ka Rubavu kayigenera arenga miliyoni 120 Frw buri mwaka, nubwo ubuyobozi bwayo buvuga ko adahagije kuko bukenera agera muri miliyoni 350 Frw.
Amakuru dukesha Igihe ni uko Akarere ka Rubavu kamaze kwandikira Urwego rw’Igihugu rw’Ubugenzacyaha (RIB) gasaba ko abayobozi ba Etincelles FC bakurikiranwa ku ikoreshwa nabi no kunyereza amafaranga kagenera iyi kipe.
Kuva ku mugoroba wo ku wa Mbere, IGIHE yagerageje kuvugana n’ubuyobozi bw’Akarere ka Rubavu kuri iki kibazo, ariko Umuyobozi w’Akarere, Mulindwa Prosper, ntiyitaba telefoni ndetse ntiyasubije ubutumwa bugufi twamwandikiye.
Ni mu gihe Umunyamabanga Nshingwabikorwa w’Akarere ka Rubavu, Ruhamyambuga Olivier, na we atigeze avugisha IGIHE mu nshuro zose twagerageje akaduha impamvu zitandukanye.
Umuvugizi wa RIB, Dr. Murangira B. Thierry, yemereye IGIHE ko “ikirego cyakiriwe tariki ya 16 Ukuboza, kigiye gusesengurwa.”
Amakuru avuga ko amafaranga Akarere ka Rubavu gashinja abayobozi ba Etincelles FC gukoresha nabi afite aho ahuriye n’ayaguzwe abakinnyi b’abanyamahanga.
Nyuma y’imikino 13 imaze gukinwa muri Shampiyona, Etincelles FC iri ku mwanya wa 14 n’amanota 12, irusha amanota abiri Kiyovu Sports ya nyuma.
About The Author
