Ababyeyi bo mu karere ka Nyabihu,Umurenge wa Mukamira,akagari ka Karengeri mu mudugudu wa Kabyaza, barasaba inzego bireba kubafasha gushaka umwana wabo w’umukobwa w’imyaka 17 babuze ku itariki ya 21 Ugushyingo 2024,Icyumweru kikaba kihiritse nta makuru ye bafite.
Uyu mwana w’umukobwa witwa Impano Becky Bella Patient asanzwe ari umunyeshuri mu mashuri yisumbuye mu kigo cy’amashuri cya APAER Kabuga ho muri Gasabo, mu mwaka wa nyuma usoza amashuri yisumbuye(level 5).
Uyu mwana ubwo yari ku ishuri yasabye uruhushya rwo kujya kwivuza araruhabwa, arataha nk’uko bishimangirwa n’umubyeyi,aho bavuga ko yari arwaye.
Yageze murugo aravuzwa,biba ngombwa ko asubira ku ishuri,ku wa 21 Ugushyingo 2024,nibwo umubyeyi we yamuhaye amafaranga y’urugendo ngo asubire ku ishuri,yateze imodoka iva Nyabihu yerekeza i Kigali ariko amakuru BWIZA yamenye ni uko yaviriyemo i Musanze akajya kureba mugenzi we witwa Mireille.
Nyuma yo kureba Mireille,yategewe moto imugeza muri gare ya Musanze nk’uko umu motari yabibwiye abo mu muryango we, avuga ko yamugejeje muri gare amubwira ko agiye gutega imujyana i Kigali.
Dusubiye inyuma gato ariko andi makuru BWIZA yamenye ni uko hari abasore babiri biga muri Kaminuza ya INES Ruhengeri bivugwa ko bari inshuti z’uyu mukobwa barimo uwitwa Bertrand n’undi witwa Paccy.
BWIZA yagerageje kuvugisha aba basore bombi,kugirango tumenye niba koko baba barigeze bamenya ko uyu mukobwa yabuze,uwitwa Bertrand we yemeye ko babaye ho inshuti ariko bataherukanaga,ndetse na Paccy yemereye BWIZA amakuru y’uko nawe yabaye inshuti ya Bella ariko bari barabaye bahagaritse ibyo gukundana ngo abanze yige.
Magingo aya ariko uyu mwana w’umukobwa telefoni ye ngendanwa inshuro zose umunyamakuru wa BWIZA yayihamagaye,yacagamo ariko ntihagire uyitaba ndetse na mubyara we witwa Vainqueur yabwiye BWIZA ko n’urubuga akunda gukoresha rwa facebook hari igihe ajya kubona akabona aruriho bakandikirana ariko ngo akabona adashaka kuvuga byinshi kuko ahita avaho.
Kugeza magingo aya ubwo twakoraga iyi nkuru ababyeyi be babwiye BWIZA ko bagerageje kugeza ikibazo cyabo muri RIB, ariko ubwo bageragayo bababwiye ko iki kibazo ntacyo babamarira,bakavuga ko bagiye kuri sitasiyo ya RIB ya Musanze/ Muhoza ndetse na Sitasiyo ya RIB ya Nyabihu ntibagire ubufashwa bahabwa.
Gusa amakuru Byoseonline ifite nuko uyu mukobwa yamaze kuboneka kandi ameze neza amakuru yaho aherereye nuko byamugendekeye turacyayashaka.
About The Author
