Claudine Uwantege wamamaye nka Veve muri Papa Sava ari mu byishimo nyuma yo kwibaruka ubuheture bwe, mu gihe yari amaze umwaka abyaye umwana akitaba Imana nyuma y’iminsi ibiri gusa avutse.
Mu kiganiro na IGIHE, Veve yavuze ko ari ibyishimo ku bwo kwibaruka undi mwana nyuma y’uko muri Gashyantare 2023 yari yibarutse ubuheta bukaza kwitaba Imana nyuma y’iminsi ibiri gusa.
Ati “Ni ibintu nabanaga nk’ihungabana kwibuka ko nabyaye umwana agahita yitaba Imana, icyakora ndayishimira ko yanshumbushije na bwo ikampa umwana w’umukobwa cyane ko n’uwo yisubije yari umukobwa.”
Uyu mugore wari umaze igihe atagaragara muri sinema, amaze ibyumweru bibiri yibarutse, akaba yavuze ko yari yaratinye kubitangaza kuko yari agifite ihungabana ry’ibyago yagize ubushize.
Ati “Kuva ntwite icyabaye ni uko mwambuze, na nyuma yo kubyara ntabwo nigeze mbivuga kuko urebye buriya nagendanaga ihungabana nuko wenda benshi batabibonaga.”
Veve warushinze mu 2020, yibarutse imfura ye mu Ukuboza uwo mwaka mbere y’uko mu 2023 yibaruka ubuheta bwe bwahise bwitaba Imana, kuri ubu akaba yamaze kwibaruka ubuheture.
About The Author
