Bamwe mu baturage bavuga ko babazwa no kubona ababyeyi bageze igihe cyo kubyara babura imbangukiragutabara zibageza ku bigo nderabuzima no ku bitaro mu gihe zimwe muri zo zikoreshwa nabi aho bigeze naho zipakirwamo isima.
Ibi barabivugira ko ku munsi w’ejo ku mbuga nkoranyambaga hasakaye videwo y’imbangukiragutabara ifite ibirango GR 856 E irimo ipakirwamo sima ,ibintu byatumye abatari bake bacika ururondogoro ku mbuga nkoranyambaga.
Umwe utemeye ko amazina ye atangazwa ,yavuze ko atari ubwa mbere abona izi modoka zagenewe gutwara abarwayi zipakira imizigo itandukanye ahamya ko izi modoka zahinduwe izo gupakira imizigo dore ko byabaye akamenyero.
Ati:”Nibyo koko si rimwe cyangwa kabiri mbona izi modoka zipakira imizigo ku muhanda,ntibabura no kubikora umurwayi akiyirimo,ese abayobozi babo bashoferi baba babizi cyangwa ayo yakoreye barayagabana?”
Yakomeje avuga ko uyu muco uri kuranga aba bashoferi atari wo dore ko byabateza akaga mu gihe umurwayi urikujyanwa kwa muganga yabapfiraho barimo baripakirira imizigo.
Undi nawe uri mu babonye izi modoka zipakira avuga ko atiyumvisha uburyo Leta irimo irahangana no kugabanya impfu z’abana n’ababyeyi bapfa babyara, mu gihe ahubwo icyifashishwa mu gukumira ibyo bibazo kirimo gukoreshwa indi mirimo yo gutwara imizigo.
Ati:”Turazi twese ko umubyeyi wavuye ku kigo nderabuzima atwawe mu mbangukiragutabara agiye kubyara uko aba ameze ,kumuta cyangwa ku mudindiza mu nzira upakira imizigo baza kuguha ho ibihumbi 3000 ,ushobora kwisanga abo bombi bapfuye,akaba aribyo bibaye intandaro yo guhura n’ibibazo bitandukanye bishobora no kuzana igifungo,bagakwiye rero kubyirinda.”
Yunzemo ko gutinda kugeza umurwayi kwa muganga bishobora gutera umubyeyi kubura umwana ugasanga agejejweyo yapfuye kubera uburangare bwa Shoferi wishakiraga indamu igeretse ku yindi.
Mu gihe twakoraga iyi nkuru ntitwari twakabasha kumenya ba nyiri iyi mbangukiragutabara gusa amakuru akavuga ko bicyekwako yaba ari iyo mu Bitaro bya Gakoma mu karere ka Gisagara gusa tukaba dukomeje gukurikirana kugirango tumenye aho ikorera.
About The Author
