FC Barcelona yanyagiye Real Madrid ibitego 4-0 ishyira iherezo ku rugendo rw’imikino 42 yari imaze idatsindwa muri Shampiyona ya Espagne, La Liga.
Uyu mukino wa mbere ku Isi, wabaye mu ijoro ryo ku wa Gatandatu, tariki 26 Ukwakira 2024.
Ni umukino wagiye kuba icyizere ari cyose kuri buri kipe kuko zombi zari zitwaye neza muri UEFA Champions League ndetse zanatsinze ibitego byinshi.
By’umwihariko, ikipe y’i Madrid yasabwaga kudatsindwa kugira ngo ikore amateka yo kumara imikino 43 idatsindwa, cyane ko yaherukaga gutsindwa muri Nzeri 2023.
Iyi kipe yari mu rugo yinjiye mu mukino mbere, itangira guhusha uburyo bw’ibitego bwabonwaga na Kylian Mbappé na Vinicius Junior.
Ku munota wa 30, Mbappé yatsinze igitego cya mbere ariko umusifuzi nyuma yo kwitabaza VAR aracyanga avuga ko yaraririye.
Nyuma y’iminota mike, iyi kipe yongeye guhusha igitego gikomeye, ku mupira Mbappé yahinduye imbere y’izamu, Jude Bellingham akawukina aryamye ariko umunyezamu Iñaki Peña umupira akawukurimo ku murongo.
Ku rundi ruhande, abarimo Lamine Yamal na Robert Lewandowski bagerageza uburyo bwinshi bw’ibitego ariko batarabasha kubyaza umusaruro amahirwe babonaga.
Igice cya mbere cyarangiye amakipe yombi anganya ubusa ku busa.
FC Barcelona yasubiranye imbaraga zikomeye mu gice cya kabiri, ku munota wa 54, Marco Casado yacomekeye Robert Lewandowski umupira mwiza asiga ba myugariro atsinda igitego cya mbere.
Nyuma y’iminota ibiri gusa, iyi kipe yongeye kuzamuka neza, Alejandro Balde ahindura umupira mwiza imbere y’izamu, usanga Lewandowski akina n’umutwe atsinda igitego cya kabiri.
Iyi kipe y’i Catalonia yari mu mukino bikomeye, ku munota wa 75, Raphinha yahaye umupira mwiza Lamine Yamal atera ishoti rikomeye rigendera hejuru atsinda igitego cya gatatu.
Bidatinze, ku munota wa 84, Iñigo Martínez yahaye umupira mwiza Raphinha asanga umunyezamu Lunin yasohotse, aramuroba atsinda igitego cya kane.
Umukino warangiye, FC Barcelona yanyagiriye Real Madrid ibitego 4-0, ihagarika urugendo rw’imikino 42 yari imaze idatsindwa, inayirusha amanota atandatu ku rutonde rwa shampiyona, aho yagize 30.
About The Author
