Ubuyobozi bw’ikipe ya Gasogi United bwatangaje ko bugiye kubaka ikipe ikomeye ariko ishingiye ku bakiri bato, aho impuzandengo y’imyaka y’abakinnyi bazakoresha mu mwaka mushya wa shampiyona ari 20.
Igihe, kuri uyu wa gatatu tariki ya 3 Nyakanga 2024 yasuye imyitozo ya Gasogi United ahagaragaragamo amasura mashya y’abakinnyi, ariko wareba ku maso ukabona bakiri bato ndetse bakaba batanamenyerewe muri ruhago y’u Rwanda nubwo bakomoka mu rwa Gasabo.
Ubwo twaganiraga na Perezida w’iyi kipe Kakooza Nkuliza Charles uzwi nka KNC yatubwiye ko iyi ari yo politike bahisemo uyu mwaka, aho bizeye ko izababyarira umusaruro.
Yagize ati: “Twazamuye abakinnyi 11 bakinaga mu ikipe yacu y’abato. Ni bo tugiye kubakiraho ikipe ikomeye. Mugiye kubona ikipe idasanzwe ishobora gukina iminota irenga 250 itananiwe. Turashaka ko impuzandengo y’imyaka y’abakinnyi umwaka utaha itazarenga 20.”
Ibi uyu muyobozi wa Gasogi United yavuze, bikaba binajyana n’amahitamo y’umutoza iyi kipe yazanye, dore ko Ghyslain Bienvenue Tchiamas bazanye asanzwe azwiho gukorana n’abakiri bato kandi ntibimubuze gutwara ibikombe.
Uyu Mufaransa unafite ubwenegihugu bwa Congo Brazzaville, yakiniye ikipe y’igihugu ya Congo Brazzaville imyaka 17 ari mu izamu, aza no gutoza amakipe menshi y’abato uhereye mu Bufaransa, ukageza ku ikipe y’igihugu y’abato ya Congo Brazzaville yagiyemo muri 2019.
“Gasogi United ni ikipe y’abanyamwuga, ni ikipe nziza, nzakomereza aho ubuyobozi bugeze bwubaka ikipe kandi turizera ko tuzabona umusaruro mwiza mu mwaka wa shampiyona utaha”.
Uyu mugabo uvuga acishije make, afite Licence A ya UEFA ndetse akaba ari umwe mu bashinzwe guhugura abatoza, “Instructeur”, iwabo mu gihugu cya Congo Brazzaville na cyo afitiye ubwenegihugu ndetse yanabayemo.
Iyi kipe ariko uretse abakinnyi bakiri bato, izaba inagendera kuri benshi bafite ubunararibonye nk’umunyezamu Dauda, myugariro Adolphe, umukinnyi wo hagati ukina yugarira mushya uri bugaragare mu myitozo ya nimugoroba, Mudeli Akbar na rutahizamu mushya na we uza kugaragara uyu munsi.
Ikipe yaherukaga gukina Shampiyona ifite impuzandengo y’imyaka mike ni Isonga yabikoze mu mwaka wa 2014 ubwo yongeraga kuzamuka mu cyiciro cya mbere ifite impuzandengo y’imyaka 21.
About The Author
