Biravugwa ko Ubuyobozi bw’ikipe ya Rayon Sports bwamaze kwandikira ishyirahamwe ry’umupira w’amaguru mu Rwanda FERWAFA ndetse n’Ikigo cy’Igihugu cy’Itangazamakuru RBA gisanzwe kinyuzaho imikino ya shampiyona y’Urwanda.
Iyi kipe ikunzwe n’abatari bake hano mu Rwanda no hanze yacyo bivugwa ko yandikiye iri shirahamwe iryihanangiriza ndetse ibuza ko Televiziyo y’u Rwanda itazongera kwerekana imikino y’iyi kipe kuko ngo nta nyungu iyi kipe ibibonamo mu gihe RBA yo iba iri kubacuruza ibabonamo amafaranga.
Muri uyu mwaka w’imikino wa 2021-2022, nibwo televiziyo y’u Rwanda yatangaje ko yasinyanye amasezerano na FERWAFA yo kunyuzaho imwe mu mikino ikomeye hano muri shampiyona y’u Rwanda gusa nta makuru y’amafaranga iki kigo cy’itangazamakuru cyaba cyaremereye FERWAFA n’amakipe agize shampiyona. Icyo gihe, Ikigo cy’Igihugu cy’Itangazamakuru RBA, cyahise gifungura indi televiziyo yitwa Magic Sports TV izajya inyuzwaho iyi mikino y’icyiciro cya mbere mu Rwanda.
Kuri ubu iyi Televiziyo kuyireba bisaba kuba ufite dekoderi ndetse wanaguze ifatabuguzi benshi banemeza ko rihenze cyane mu gihe amakipe baba bacuruza nta nyungu bayibonamo, ni muri urwo rwego amakuru ahari ari uko komite nyobozi ya Rayon Sport yicaye igakorana inama bakanzura ko iyi televiziyo itazongera kujya ku kibuga cyangwa se nabo ntibazakine mu gihe FERWAFA idasubije iyi kipe ngo bagirane ibiganiro.
Ubusanzwe ku isi hose amakipe yose arebwa ku mateleviziyo atandukanye aba yaragiranye amasezerano aho bahabwa amafaranga kubera kuba berekana imikino yayo.
Ubundi ikipe ya Rayon bivugwa ko yanditse ibaruwa ya mbere ibwira FERWAFA iby’iki kibazo maze Ferwafa igashira agati mu ryinyo ntiyabasubiza ari nabwo bongeye kuyandikira ibaruwa ya kabiri yo bavuga ko nibatayisubiza ngo bagirane ibiganiro bazitabaza amategeko abarengera bakaba bakwanga gikina mu gihe umupira uraca kuri televiziyo.
Biravugwa ko hari andi makipe ari inyuma ya Rayon Sport harimo Gasogi United, Gorilla FC ndetse nandi yose atishimiye iki gikorwa cyo kugurisha amashusho yabo kandi bo nta nyungu abibonamo. Ku munsi w’ejo nibwo ikipe ya Rayon Sport ifitanye umukino na Police FC akaba ari ho twiteze kureba icyo iyi kipe yakora mu gihe FERWAFA ntacyo iyisubije.
About The Author
