Ikipe y’ingabo z’igihugu, APR FC irashaka gusinyisha abakinnyi babiri b’Abarundi bigaragaje muri shampiyona y’ikiciro cya mbere mu Burundi.
Abarundi babiri Élie Eldinho Mkono w’imyaka 24 ukinira Bumamuru FC na Henry Msanga w’imyaka 23 wa Flambeau du Centre bari kuganirizwa na APR FC ku buryo ibiganiro bigenze neza aba bakinnyi bakisanga muri iyi kipe yambara Umweru n’Umukara.
Aba bakinnyi bose icyo bahuriye ni uko bakina mu kibuga hagati aho Eldinho akina asatira mu gihe Henry Msanga we akina yugarira izamu.
Ibiganiro ku mpande zombi birakomeje kugira ngo harebwe ko aba basore baza gufasha iyi kipe yitegura gutwara igikombe cya shampiyona, kuzahagararira neza u Rwanda mu mikino Nyafurika.
Ntiharamenyekana amafaranga APR FC yifuza gutanga kuri aba bakinnyi ndetse iri no kubaganiriza mu ibanga kuko isoko ry’igura n’igurisha rifunze.
Biteganyijwe ko ibiganiro ku mpande zombi bigenze neza, aba basore bazaza mu mpeshyi y’uyu mwaka kuko aribwo isoko rizaba rifunguye.
Élie Eldinho Mkono amaze gutsindira Bumamuru FC ibitego 2 n’imipira 10 ivamo ibitego mu mikino 23, ni mu gihe mugenzi we Henry Msanga yagize uruhare mu bitego 9 aho yatsinze 4 n’imipira 5 ivamo ibitego muri Flambeau du Centre.
About The Author
