Umunya-Brésil, Dani Alves wamamaye muri FC Barcelona wari umaze umwaka afunze azira gufata ku ngufu, yarekuwe nyuma yo kwishyura miliyoni 1€ no gukora ¼ cy’igifungo cye.
Tariki 20 Mutarama 2023 ni bwo Dani Alves yafunzwe ashinjwa gufata ku ngufu byatumye akatirwa igihano cy’imyaka ine n’amezi atandatu.
Kuri uyu wa Gatatu, tariki 20 Werurwe 2024 nibwo Urukiko rw’i Barcelona muri Espagne rwategetse ko uyu mugabo arekurwa nyuma yo kwishyura miliyoni 1€ no gukora ¼ cy’igifungo cye (umwaka umwe muri ine yari yakatiwe).
Alves ashinjwa gukora iki cyaha mu ijoro rya tariki 30 ishyira 31 Ukuboza 2022, aho bivugwa ko yafatiye ku ngufu umukobwa ubwo bari mu bwiherero bw’akabyiniro ka Sutton i Barcelone.
Icyakora uyu mugabo w’imyaka 40 nyuma y’inshuro nyinshi ahakana ibyo yaregwaga yaje kubyemera ariko avuga ko ibyo bakoze bari babanje ku byumvikanaho.
Dani Alves yakiniye FC Barcelona kuva mu 2008 kugeza 2016, ariko aza kuyisubiramo mu 2021/2022. Uyu mugabo kandi ni we mukinnyi wa kabiri wahamagawe inshuro nyinshi mu ikipe y’Igihugu ya Brésil.
About The Author
