![](https://www.byoseonline.rw/wp-content/uploads/2024/01/inya1216-6f238.jpg)
Gasogi United yatsinze Rayon Sports ibitego 2-1 mu mukino w’Umunsi wa 16 wa shampiyona wabaye ku wa Gatanu, tariki 12 Mutarama 2024, kuri Kigali Pelé Stadium.
Wari umukino wa mbere mu yo kwishyura nyuma y’ukwezi amakipe yari amaze ari mu kiruhuko.
Gasogi United yatangiranye imbaraga uyu mukino yiharira umupira cyane ariko wakinirwaga mu kibuga hagati cyane.
Ku munota wa gatandatu, Lisele Cédric Lisombo, yisanze imbere y’izamu ariko ananirwa kumvikana na Kabenga Serge umupira bawupfusha ubusa.
Ku munota wa 10, Rayon Sports yateye koruneri nziza, Rwatubyaye Abdul akinisha umutwe umupira usanga Ngendahimana Eric ananirwa guhindukira ngo awutere mu izamu.
Muri iyi minota, Gikundiro yasatiraga cyane ariko uburyo bw’ibitego bwabonwaga na Muhire Kevin ndetse na koruneri nyinshi ntizigire icyo zibyara.
Ku munota wa 15, Serumogo Ally, yatanze umupira nabi ufatwa na Mugisha Rama Joseph ahita amutega, umusifuzi Rulisa Patience atanga ‘coup franc’ n’ikarita y’umuhondo kuri Serumogo.
Iyi ‘coup franc’ yatewe na Malipangou Christian Théodore, ariko Umunyezamu Hategekimana Bonheur umupira awukuramo, Ganijuru Elie awushyira muri koruneri.
Nyuma y’iminota ibiri gusa, Kalisa Rachid yongeye gutakaza umupira, Kabanda Serge asigarana n’Umunyezamu Hategekimana ariko ateye umupira ukubita igiti cy’izamu uvamo.
Gasogi United yakomeje guhusha uburyo bukomeye bw’ibitego, ku munota wa 26, Malipangou yahinduye umupira mwiza imbere y’izamu usanga Muderi Akbar akinnye n’umutwe umupira uca hanze gato y’izamu.
Bidatinze, Akbar yongeye kuzamukana umupira yihuta asiga Nsabimana Aimable awuhindura mu rubuga rw’amahina usanga Kabanda Serge atsinda igitego cya mbere ku munota wa 28.
Ku munota wa 35, iyi kipe yongeye guhusha igitego, ku mupira Malipangou yacomekeye Lisombo ateye ishoti rikomeye umunyezamu Hategekimana arikuramo.
Mu minota ya nyuma y’igice cya mbere, Serumogo yahinduye umupira imbere y’izamu usanga rutahizamu Paul Gomis awukina n’umutwe ariko Nshimiyimana Marc Govin umupira awukuriramo ku murongo.
Ku munota wa 42, Umunyezamu Hategekimana Bonheur yongeye gukiza Rayon Sports, ku mupira wavuye muri koruneri Lisele Lisombo awukina n’umutwe, uyu munyezamu awukuramo n’amaguru.
Igice cya Mbere cyarangiye Gasogi United yatsinze Rayon Sports igitego 1-0.
Gikundiro yatangiranye impinduka Igice cya Kabiri, aho Héritier Luvumbu, Mitima Isaac na Alsény Agogo Camara basimbuye Kalisa Rachid, Nsabimana Aimable na Paul Gomis.
Gasogi United yakomeje gusatira, ku munota wa 56, Muderi Akbar acomekerwa umupira azamuka wenyine atsinda igitego cya kabiri ariko umusifuzi w’igitambaro avuga ko habayeho kurarira.
Nyuma y’iminota ibiri gusa, Mugisha Joseph, yazamukanye umupira neza agundagurana na Rwatubyaye atanga umupira mwiza kwa Kabanda Serge atsinda igitego cya kabiri.
Mu minota 65, Rayon Sports yatangiye kugerageza gushotera hanze y’urubuga rw’amahina kuko kumenera mu bwugarizi bwa Gasogi United byari byayigoye cyane.
Mu minota 75, Gasogi yasubiye inyuma ikina yugarira cyane byatumaga Gikundiro yihariye umukino cyane umukino.
Ku munota wa 80, Luvumbu yacomekeye umupira Serumogo yitegura gutera umupira mu izamu, Marc Govin awumukura ku kirenge.
Ku munota wa 90+4, Luvumbu yatsinze igitego cya mbere cya Rayon Sports ku mupira mwiza yateye kuri ‘coup franc’ yavuye ku ikosa ryakorewe Mitima Isaac.
Umukino warangiye Gasogi United yatsinze Rayon Sports ibitego 2-1. Aya makipe ni na yo yafunguye Shampiyona ku wa 18 Kanama 2023 aho icyo gihe Gikundiro yawutsinze ku bitego 2-1, bivuze ko iyi kipe yayigaranzuye.
Gasogi United yahise ifata umwanya wa karindwi n’amanota 21, mu gihe Gikundiro yagumye ku wa kane n’amanota 27 muri Shampiyona y’u Rwanda.