Guverinoma y’u Rwanda yatangaje ko yatunguwe n’icyemezo cya Leta y’u Burundi cyo gufunga imipaka ihuza ibihugu byombi, ishimangira ko ari umwanzuro uzagira ingaruka ku rujya n’uruza rw’abaturage ndetse n’imihahirane y’ibihugu byombi.
Ku mugoroba wo ku wa Kane, tariki 11 Mutarama 2024, ni bwo byamenyekanye ko Leta y’u Burundi yafashe icyemezo cyo gufunga imipaka yose ibuhuza n’u Rwanda.
Mu itangazo Guverinoma y’u Rwanda yashyize hanze kuri uyu Kane, yavuze ko yamenye iby’iki cyemezo cy’uruhande rumwe binyuze mu itangazamakuru.
Iti “Guverinoma y’u Rwanda binyuze mu itangazamakuru yamenye iby’umwanzuro wafashwe n’uruhande rumwe wa Guverinoma y’u Burundi wo kongera gufunga imipaka ibuhuza n’u Rwanda.”
U Rwanda rwakomeje ruvuga ko “uyu mwanzuro udakwiriye uzabangamira ukwishyira ukizana mu bijyanye n’urujya n’uruza rw’abantu ndetse n’urw’ibicuruzwa hagati y’ibihugu bibiri, ndetse ukaba uhonyora amahame y’Umuryango wa Afurika y’Iburasirazuba mu bijyanye n’ubufatanye no kwihuza.”
U Burundi bwafashe umwanzuro wo gufunga imipaka ibuhuza n’u Rwanda, mu gihe hari hashize iminsi mike Perezida Evariste Ndayishimiye aciye amarenga kuri iki cyemezo, nyuma yo gushinja umuturanyi wabwo gushyigikira Umutwe wa RED-Tabara urwanya leta y’igihugu cye.
Ni ibirego u Rwanda rwahakanye, rushimangira ko nta nyungu rwagira mu guhungabanya umutekano w’iki gihugu.
Si ubwa mbere u Burundi bufata icyemezo cyo gufunga imipaka ibuhuza n’u Rwanda, kuko no hagati ya 2015 na 2021 yari ifunze.
Ubwo Perezida Evariste Ndayishimiye yari agiye ku butegetsi, ibihugu byombi byiyemeje kuzahura umubano ariko u Burundi bugatsimbarara ko bukeneye abashinjwa guhirika ubutegetsi bwa Pierre Nkurunziza bahungiye mu Rwanda, mu gihe rwo rwerekanaga ko bihabanye n’amategeko mpuzamahanga agenga impunzi.
About The Author
