Perezida Kagame yashimiye Umuryango Global Citizen wahisemo u Rwanda nk’igihugu cyo gutangirizamo umushinga wa Move Afrika, ashimangira ko Abanyarwanda biteguye kujya bakira ibi bitaramo buri mwaka.
Ni ubutumwa yatangiye mu gitaramo cya mbere cya “Move Afrika: A Global Citizen Experience” cyabereye muri BK Arena mu ijoro ryo kuri uyu wa Gatatu tariki 6 Ukuboza 2023.
Ni igitaramo Perezida Kagame na Madamu Jeannette Kagame bitabiriye aho bifatanyije n’ibihumbi by’abakunzi b’umuziki bari bakereye kwishimana n’Umuraperi Kendrick Lamar.
Abandi bahanzi baririmbye muri iki gitaramo barimo umuhanzikazi ukunzwe muri Tanzania, Zuchu, Umunyarwanda Bruce Melodie, Ariel Wayz ndetse n’umubyinnyi wabigize umwuga, Sherrie Silver.
Mu ijambo yagejeje ku bitabiriye iki gitaramo, Umukuru w’Igihugu, Paul Kagame yavuze ko ari umugoroba w’ibyishimo.
Ati “Mbega uburyo bwiza bwo gusoza umwaka! Hamwe n’umuziki n’ibyishimo.”
Perezida Kagame yagaragaje ko Afurika ikwiye kwigira no kwihaza ku ngengo y’imari binyuze mu gukorana bizatuma umugabane utsinda imbogamizi ugihura na zo.
Ati “Tugiye kujya twakira Global Citizen buri mwaka binyuze muri Move Afrika. Ndizeye ko mwisanze mu rugo mwese.’’
Perezida Kagame yashimiye Umuryango Global Citizen wahisemo u Rwanda nk’igihugu cyo gutangirizamo umushinga wa Move Afrika, ashimangira ko Abanyarwanda biteguye kujya bakira ibi bitaramo buri mwaka.
Yavuze ko insanganyamatsiko y’uyu muryango igaruka ku kuba Isi ariwo mutungo abayituye bafite.
Ati “Natekereje kuri iyi nsanganyamatsiko, Isi ni umutungo ntagereranywa.”
Umukuru w’Igihugu yavuze ko iki ari igihe cyo gushimira Abajyanama b’Ubuzima.
Ati “Ndashaka guharira uyu mwanya, gushimira Abajyanama b’Ubuzima batuma dukomeza kugira ubuzima bwiza, butekanye. Kandi Afurika yubakiye ku buzima n’abaturage bize.”
Umukuru w’Igihugu yashimangiye ko gukorera hamwe byafasha Abanyafurika mu gukemura ibibazo byose uyu Mugabane ufite.
Yasoje ijambo rye yifuriza abitabiriye iki gitaramo Noheli Nziza n’Umwaka Mushya Muhire wa 2024.
Umuyobozi Mukuru akaba n’umwe mu bashinze Global Citizen, Hugh Evans, yavuze ko bishimiye cyane kuba muri Kigali by’umwihariko muri BK Arena.
Yagaragaje ko yanyuzwe n’urugwiro bakiranywe, anashimira Perezida Kagame wemeye kwakira iki gikorwa mu Rwanda.
Ku bufatanye n’Urwego rw’Igihugu rw’Iterambere, RDB, ibitaramo bya “Move Afrika: Rwanda” bizajya bibera i Kigali buri mwaka mu gihe cy’imyaka itanu iri imbere, ni ukuvuga kugeza mu 2028.
Ibitaramo byiswe “Move Afrika: Rwanda” byateguwe na Global Citizen ku bufatanye n’Ikigo PGLang cyashinzwe na Kendrick Lamar, afatanyije na Dave Free.
About The Author
