Ubuyobozi bw’akarere ka Rutsiro bwabujije abarimu bigisha mu mashuri ya Leta agaherereyemo kongera kurya ku biryo by’abanyeshuri, kugira ngo abana bajye bahabwa ingano yose y’ifunguro bagenewe.
Ni ibikubiye mu ibaruwa umuyobozi w’akarere ka Rutsiro, Mulindwa Prosper aheruka kwandikira abayobozi b’ibigo by’amashuri yo muri kariya karere.
Ku wa 03 Ugushyingo ni bwo mu Rutsiro hari habereye inama yigaga kuri kiriya kibazo. Ni inama icyo gihe yahuje abashinzwe uburezi n’abahagarariye inama z’ababyeyi.
Meya Mulindwa mu ibaruwa yanditse ku wa Gatanu tariki ya 17 Ugushyingo, yasabye abayobozi b’ibigo gukora ibishoboka byose kugira ngo umuco wo kugaburira abarimu ibiryo by’abanyeshuri uhagarare.
Mu ibaruwa yandikiye buri muyobozi w’ikigo cy’ishuri yagize ati: “Nkwandikiye uru rwandiko ngo ngusabe kwirinda no guhagarika guha amafunguro abarezi n’abandi bakozi ku ishuri bafata ku mafunguro yagenewe abanyeshuri saa sita.”
Meya yagiriye abayobozi b’ibigo inama yo kwicarana n’ababyeyi hakigwa uko haboneka amafaranga yo kubahahira.
Avuga ko hari abafite umuco mwiza wo kubiganiraho n’abarezi, hakaba haremejwe amafaranga yo kubahahira. Icyakora na bo yabasabye gukomeza kubinoza.
About The Author
