Abashumba 6 bari mu bashinze itorero Zion Temple barasaba urukiko rwisumbuye rwa Gasabo kwemeza ko Apôtre Paul Gitwaza atakiri umuvugizi waryo kuko bemeza ko bamwirukanye.
Bishops Claude Djessa, Dieudonne Vuningoma, Pierre Kaberuka, Richard Muya, Charles Mudakikwa na Paul Daniel Kukimunu ni bo batanze ikirego.
Urubanza rwabaye nta n’umwe mu baregwa uri mu rukiko nk’uko inkuru ya BBC Gahuza ibivuga.
Abatanze ikirego na bo ntibagaragaye mu rukiko, Ababunganira mu mategeko ku mpande zombi ni bo bari bahanganye.
Ubwo bari bahawe ijambo, abunganira abaregwa bazamuye inzitizi, basaba ko zikurwa mu nzira urubanza rukabona gukomeza.
Bavuze ko abashumba batandatu bari inyuma y’ikirego batabifitiye ububasha kuko umuryango ushingiye ku myemerere Authentic World Ministries /Zion Temple uyoborwa na Paul Gitwaza, kandi akaba atari we watanze ikirego.
Bavuga ko abashumba bareze bari bakwiye kubikora mu izina ryabo, kuko batayoboye umuryango kandi bakaba batari babiherewe uburenganzira na Paul Gitwaza, bavuga ko ari we muyobozi wemewe.
Bavuze kandi ko abatanze ikirego batabanje gutakamba, ari byo kwiyambaza urwego ruri hejuru y’urwego rw’igihugu rw’imiyoborere, RGB nk’uko amategeko abiteganya.
Gusa abunganira abatanze ikirego bo bavuga ko RGB (Urwego rw’Igihugu rw’Imiyoborere, RGB) ari ikigo cyigenga kitagira urwego rukiri hejuru.
Ku ruhande rwabo, abunganira abatanze ikirego bavuga ko cyatanzwe mu izina rya Authentic World Ministries /Zion Temple kandi ko byakozwe n’ababifitiye ububasha nyuma yo kwirukana Paul Gitwaza wayoboraga umuryango, ndetse akaba ari n’umwe mu bawushinze.
Bavuga ko kwirukana Gitwaza bari babifitiye ububasha kuko inama y’abashinze umuryango yemerewe gushyiraho, ndetse no gusezerera umuvugizi w’umuryango ari na we muyobozi wawo.
Gusa icyemezo aba bashumba bafashe mu kwezi kwa kabiri k’umwaka ushize cyaje guteshwa agaciro n’urwego rw’igihugu rw’imiyoborere, RGB ruvuga ko byakozwe binyuranyije n’amategeko.
Izi mpaka zigomba kubanza gukurwa mu nzira mbere y’uko urubanza nyirizina rutangira, icyemezo cy’urukiko kikaba gitegerejwe ku itariki ya 24 Ugushyingo, 2023.
Mu kwezi kwa kabiri umwaka ushize ni bwo aba bashumba bamenyesheje Paul Gitwaza ko akuwe ku mirimo. Ariko iki cyemezo cyabo kiza kuvuguruzwa n’urwego rw’igihugu rw’imiyoborere, RGB, ruvuga ko kinyuranije n’amategeko.
Mu kirego batanze mu rukiko, basaba kandi ko rusesa iki cyemezo cya RGB gitambamira ikurwaho rya Paul Gitwaza kuko bavuga ko cyashingiye ku nyandiko bo bafata nk’impimbano.
About The Author
