Isimbi Alliance uherutse kwibasirwa bikomeye na bamwe mu bakoresha imbuga nkoranyambaga bamushinja kuvuga nabi Icyongereza mu birori bya Trace Awards, yamaze gushyira hanze filime yakinwe muri uru rurimi.
Ni filime yise ‘Good book, bad cover’, ikaba ikinwe mu ndimi zirimo Icyongereza n’Igiswahili.
Mu kiganiro na Igihe dukesha iyi nkuru, uyu mugore yavuze ko yahisemo gukora iyi filime mu ndimi z’amahanga mu rwego rwo kureba niba yakwagura sinema nyarwanda ikaba yatangira no kwerekanwa ku ruhando mpuzamahanga.
Ku rundi ruhande uyu mugore ufite izina rikomeye mu myidagaduro y’u Rwanda, ahamya ko atirengagije isoko ry’abumva Ikinyarwanda ahamya ko hari izindi filime nyinshi ateganya gukora bazibonamo.
Ikindi Alliah Cool yakomojeho ni uko iyi filime ye nshya yayikoze nyuma yo gutangira gukorana na sosiyete yo muri Nigeria iri kumufasha byinshi muri sinema, byatumye atekereza uko yazamura ibikorwa bye ku rundi rwego.
Abajijwe icyo avuga ku bamaze iminsi bamwibasira bamushinja kuvuga nabi Icyongereza muri Trace Awards, Alliah Cool yavuze ko abo atabatindaho, cyane ko we nta kibi azi yakoze ku buryo yakwishinja.
Aha yagize ati “Njye nta kibi nzi nakoze, ababyumva ukundi ubwo bo bafite impamvu zabo bwite, ibaze umuntu kuvuga ngo wavuze nabi ururimi rutari urwo wavukiyemo?”
Iyi filime nshya ya Alliah Cool igiye hanze ikurikira iyo yise ‘Alliah The Movie’ yasohotse mu mpera za 2021 ndetse ikazasohoka mu gihe hagitegerejwe indi yitwa ‘Accidental Vacation’ yahuriyemo n’abakinnyi bakomeye by’umwihariko muri Nigeria.
Iyi filime yakomotse ku nkuru yanditswe n’umunya-Nigeria, Ajalaja Stanley ari na we wayitunganyije mu buryo bw’amashusho, igaragaramo abakinnyi nka Francis Zahabu, Mbera Amir, Camille Yvette, Alice Ishimwe, Igihozo Nshuti Mireille.
About The Author
