Minisitiri w’urubyiruko, Dr Utumatwishima Abdallah, arahanura abakoresha imbuga nkoranyambaga bahanganisha umuhanzi Itahiwacu ’Bruce Melodie’ na mugenzi we Mugisha Benjamin uzwi nka The Ben.
Kuri izi mbuga, cyane cyane kuri X, hamaze iminsi habaho igereranya ry’aba bahanzi, aho bamwe bavuga ko umwe ari umuhanzi ukomeye mu Rwanda, abandi bakavuga undi.
Byageze n’aho hahwihwiswa amakuru y’uko Bruce Melodie yigeze gushaka kwica igitaramo The Ben yagiriye mu Burundi tariki ya 1 Ukwakira 2023, biteza umwuka mubi hagati y’abahanzi bombi.
The Ben ubwo yari muri iki gitaramo i Bujumbura, yashimiye Imana ko cyitabiriwe ku bwinshi, anashimangira ko hari abashatse kucyica. Ati: “Umwanzi uguhiga azahora atsindwa in the name of Jesus. Mwumvise ko hari abashatse kwica iki gitaramo.”
Bruce Melodie ubwo yari agiye gutaramira mu karere ka Ngoma muri Iwacu Muzika Festival, yatangaje ko atigeze ashaka kwica igitaramo cya The Ben kandi ko uyu muhanzi mukuru kuri we akwiye kugabanya ubwoba, akibanda ku kazi. Ati: “Na we ariko ajye agabanya ibintu by’ubwoba.”
Kuri uyu wa 21 Ukwakira 2023, Bruce Melodie yataramiye abitabiriye umuhango wo guhemba abahanzi bitwaye neza wa Trace Awards, yifashishije indirimbo ’When She Is Around (Funga Macho)’ yasubiranyemo na Shaggy. The Ben na we yafashije Diamond Platinumz mu kuririmba indirimbo ’Why’ bakoranye.
Ubwo aba bahanzi bari bamaze kuririmba no kuba Bruce Melodie yahawe igihembo cy’uwitwaye neza mu Rwanda, ku mbuga nkoranyambaga hongeye kubaho igereranya ry’aba bahanzi, habazwa “Urenze undi”.
Minisitiri Utumatwishima yavuze ko iri ’hanganisha’ ridakwiye, kuko aba bahanzi bombi bari mu beza igihugu gifite. Ati: “Nubwo bishobora kuba byazamura #vibes za weekend nyuma ya #TraceAwardsRwanda2023, guhanganisha Ben na Melodie, si sawa. Spaces na za Youtube zizana urwango ni bibi. Aba basani bombi ni mu beza cyane u #Rwanda rufite. Ahubwo badupangire #2 Men show vuba aha. #RwoT”
Bruce Melodie ari mu muziki kuva mu mwaka w’2011. The Ben we yawutangiye mu 2009.
About The Author
