Umutoza wa Rayon Sports FC, Yamen Zelfan ndetse n’abafana bayo batukanye imbona nkubone ku mukino yanganyijemo na Marines FC ibitego 2-2.
Kuri uyu wa Gatandatu, tariki ya 7 Ukwakira 2023, nibwo Rayon Sports yerekeje mu Karere ka Rubavu kuri Stade Umuganda gukina umukino w’ikirarane cy’umunsi wa kane wa Shampiyona.
Ni umukino watangiranye imbaraga ku ruhande rwa Rayon Sports ndetse ibona n’igitego ku munota wa kabiri cyatsinzwe na Youssef Rhab habayeho guhererekanya neza kwa Luvumbu na Joackiam Ojera.
Iki gitego cyatumye abafana bizera ko bashobora gucyura amanota atatu kuri uyu munsi ariko icyizere cyaraje amasinde.
Nyuma y’iminota mike Ojera yashyizemo ikindi biha amahirwe Rayon Sports yo kujya mu karuhuko iri imbere ku bitego 2-0 ariko bigaragara ko Marines FC yari yinjije igitego ifite amahirwe yo kuba yakwishyura.
Mu mpera z’igice cya mbere niho byatangiye kugaragara ko bitaza koroha ubwo, Mujyanama Fidele, yashyamiranaga n’umusifuzi, Nsabimana Célestin, amubwira ko yagombaga kuba hari penaliti yabahaye ariko akayirengagiza.
Ntabwo byarangiriye aho ahubwo mbere yo gutangira igice cya kabiri Nsabimana yeretse ikarita itukura Mujyanama, amusohora mu kibuga nubwo yasohotse bigaragara ko atishimiye uwo mwanzuro.
Igitutu cyazamutse ku batoza, abafana ndetse n’abakinnyi bituma habaho kutumvikana hagati yabo ku myanzuro yafatirwaga mu kibuga.
Mu minota 60 y’umukino Youssef Rhab wagaragaraga nk’uwananiwe yatakazaga imipira myinshi iturutse ku kuba yayitindanaga ntayihe bagenzi be, Umutoza Yamen Zelfan yagaragazaga kutanezezwa n’ibyo uyu Munya-Maroc ari gukora.
Kutavuga rumwe nawe byageze no kuri myugariro Mitima Isaac utamushyigikiraga ku byo ari gukora. Ariko Zelfani nk’uwari ufite umwanzuro wa nyuma abakuramo bombi abasimbuza Aboubakar Mgadam na Mugisha Francois ‘Master’.
Abakunzi ba Rayon Sports bahise bajya mu kirere bose bagaragaza ko batishimiye impinduka akoze, mu ijwi riri hejuru cyane Malayika wihebeye iyi kipe we agira ati “tubura itike yo kugera mu matsinda nanone ni uku wabigenje, kutumvikana n’abakinnyi ni byo bitugejeje aha. Utuvire mu ikipe.”
Umutoza ntiyihanganiye bamwe mu bafana barimo Malayika ahubwo nawe yiyambuye umwambaro w’ubutoza ajya gusubizanya nawe bisaba ko abashinzwe umutekano bajya gukura umufana mu nzira.
Nyuma yo gukora impinduka atashyigikiwemo n’abafana yishyuwe igitego cya kabiri ku munota wa 86 n’abafana bari baryumyeho batangira kumurwanya.
Umukino urangiye Yamen Zelfan arimo agana mu rwambariro bakomeje kumukurikiza amagambo nawe asubizanya nabo kugeza aho abapolisi aribo bahagobotse bakamwingingira kubava imbere ubona ko atabyifuza.
Yamen Zelfan utari guhirwa no kubona intsinzi ku mikino itandukanye ya Rayon Sports ari gusabwa n’abafana kubarekera ikipe yabo kuko nta terambere bamubonamo.
Nyuma yo gusezererwa mu matsinda ya CAF Confederation Cup, Murera iri ku mwanya wa karindwi yanganyije na Marines FC iri ku mwanya wa munani zinganya amanota atandatu ibitego 2-2.
About The Author
