Messengers Singers, Itsinda ry’abasore bahimbaza Imana rikorera Ivugabutumwa mu Itorero ry’Abadiventisiti b’Umunsi wa Karindwi, yahagaritswe mu gihe cy’amezi atandatu biturutse ku gitaramo iherutse gukora yatumiyemo Israel Mbonyi.
Aba basore ubusanzwe basengera mu Itorero ry’Abadiventisiti, Ishami rikoresha Ururimi rw’Igifaransa riherereye i Kanombe. Baheruka gukora igitaramo cyiswe “Siryo Herezo Live Concert” cyabaye tariki 9 Nzeri 2023 muri Expo Ground i Gikondo.
Iki gitaramo cyagenze neza, cyanabereyemo “Live Recording y’indirimbo 10 zigize album nshya ya Messengers Singers, cyari cyatumiwemo Israel Mbonyi uri mu bahanzi bakunzwe mu Rwanda no hanze.
IGIHE yahawe amakuru y’impamo na bamwe mu basengana n’aba basore, y’uko byari bimaze iminsi bihwihwiswa ko bagomba guhabwa igihano cyo kumara igihe runaka bataririmba, ndetse bikaba byaratangajwe ku wa Gatandatu ushize tariki 30 Nzeri nyuma y’amateraniro.
Umwe mu baduhaye amakuru, yagize ati “Kuva mu itorero byamenyekana ko aba basore batumiye Mbonyi kandi adasengera mu Badive byazanye umwuka mubi. Ibaze ko no mu materaniro igitaramo cyabo kitamamazwagamo kandi ubundi ibindi bitaramo iyo abahanzi babifite byamamazwa.’’
Umuyobozi wa Messengers Singers, Ishimwe Emile, yabwiye Igihe ko ku byerekeye igihano bahawe ‘nta makuru yagitangaho.’
Yavuze ko kuri ubu berekeje imbaraga mu gutunganya album nshya bafatiye mu gitaramo kugira ngo indirimbo zitangire gusohoka mu minsi ya vuba iri imbere.
Muri aya mezi atandatu Messengers Singers igiye kumara mu gihano [bagawa] ntiyemerewe gukora ibikorwa ibyo ari byo byose byerekeye umurimo wo kuririmba mu Itorero ry’Abadiventisiti.
Bimaze kuba ikibazo aho amadini amaze guhinduka nk’amashyaka mu Rwanda ku buryo usanga abahanzi bamwe babuzwa kwitabaza bagenzi babo mu bikorwa bitandukanye kubera ko badasengana. Ibintu bigenda bigira ingaruka mbi ku ivugabutumwa.
Messengers Singers ni itsinda ryashinzwe ku wa 30 Kamena 2009. Rigizwe n’abaririmbyi barindwi; ryatangiriye ivugabutumwa binyuze mu ndirimbo muri College Adventiste de Gitwe mu Karere ka Ruhango mu Majyepfo y’u Rwanda.
Kugeza ubu iri tsinda rifite album ebyiri z’amajwi na album imwe y’amashusho n’izindi ndirimbo ryagiye risohora zitandukanye zikanyura imitima y’abakunzi b’ibihangano bihimbaza Imana. Rizwi mu ndirimbo zirimo “Siryo herezo”, “Sinziheba”, “Yesu arakomeye”, “Rubanda”, “Ajya Amba Hafi”, “Senga”, “Sinziheba” n’izindi.
About The Author
