Ubuyobozi bw’umutwe witwaje intwaro wa M23 buremeza ko igisirikare cya Repubulika ya demukarasi ya Congo, FARDC, n’ihuriro ry’imitwe ya Wazalendo byatangiye kugaba ibitero mu duce dutandukanye two muri teritwari ya Masisi.
Perezida w’uyu mutwe, Bertrand Bisimwa, mu butumwa yatangarije ku rubuga X kuri uyu wa 1 Ukwakira 2023, yatangaje ko FARDC yasohoje isezerano ryayo ryo gutera ubwoba M23.
Yagize ati: “Leta ya Kinshasa yashyize mu bikorwa igikangisho cyayo. Ihuriro ryayo riri kugaba ibitero mu duce twa Kilolirwe, Kibarizo, Busumba na Kirumbu. Iri subukurwa ry’imirwano ryaturutse mu cyemezo kidakwiye cya Bwana Tshisekedi.”
Bisimwa yamenyesheje Abanyekongo n’umuryango wa EAC ko Leta ya RDC ikwiye kwirengera ingaruka z’intambara yashoje kuri M23, akaba ahamya ko nta kindi igamije, keretse gusa kuburizamo amatora ateganyijwe mu Kuboza 2023.
Umuvugizi w’igisirikare ku rwego rw’intara ya Kivu y’Amajyaruguru, Lt Col. Guillaume Ndjike Kaiko, yatangaje ko M23 yemeza ko ikorerwamo n’ingabo z’u Rwanda, ari yo yashotoye ingabo z’igihugu kuko ngo yabanje kugaba ibitero ku birindiro byazo muri Kilolirwe.
Lt Col. Ndjike yagize ati: “Ingabo z’u Rwanda zikorera mu mutwe wa M23 zagabye igitero muri Kilolirwe muri teritwari ya Masisi kuri iki Cyumweru, tariki ya 1 Ukwakira, mu gushyira mu bikorwa umugambi wazo w’intambara no kurenga ku guhagarika imirwano.”
Iyi mirwano ibayeho nyuma y’aho FARDC imaze iminsi iteguje ko igiye kwirukana M23 mu bice bitandukanye igenzura, uyu mutwe na wo uvuga ko witeguye kwirwanaho.
About The Author
