Mu gihe iminsi y’igitaramo cya The Ben i Burundi yegereje, amakuru aturuka i Bujumbura ahamya ko abazitabira icya VIP cyateguwe ku wa 30 Nzeri 2023 bakabasha kwishyura itike ya miliyoni 10FBu (arenga miliyoni 3Frw) bazanasurwa n’uyu muhanzi mu rugo.
Ibi byagarutsweho n’abateguye iki gitaramo ubwo babwiraga itangazamakuru ry’i Burundi ibijyanye n’amatike yo kwinjira mu bitaramo The Ben azakorera i Bujumbura.
Ni ibitaramo bibiri birimo icya VIP giteganyijwe ku wa 30 Nzeri 2023 n’icya rusange gitegerejwe ku wa 1 Ukwakira 2023.
Mu gitaramo cya VIP giteganyijwe kubera ahitwa Eden Garden Resort ku wa 30 Nzeri 2023 kwinjira bizaba ari ibihumbi 100FBu (arenga ibihumbi 30Frw) mu myanya isanzwe, ameza y’abantu umunani bari kumwe bakishyura miliyoni 2FBu (hafi ibihumbi 700Frw) abayiriho bagahabwa amacupa abiri ya champagne bihitiyemo.
Ni mu gihe hari itike iri kugura miliyoni 10FBu (arenga miliyoni 3Frw) aho uzaba yaguze iyi tike azaba yemerewe kwinjirana n’abantu umunani bakanywa ibyo bashaka ijoro ryose ari nako barya ibyo bihitiyemo.
Uretse ibyo ariko abazagura iyi tike bazagira amahirwe yo gusurwa na The Ben mu rugo.
Bukeye bw’uyu munsi hateganyijwe igitaramo rusange kizabera ahitwa Jardin Public, kwinjira bikazaba ari ibihumbi 10Fbu (arenga gato ku bihumbi 3Frw) mu myanya isanzwe n’ibihumbi 50FBu (hafi ibihumbi 20Frw) mu myanya y’icyubahiro.
Itike ya menshi muri iki gitaramo izaba igura miliyoni 2FBu ku meza y’abantu umunani bahabwe icupa rya champagne bihitiyemo.
About The Author
