CSP Kayumba Innocent wayoboye igororero rya Rubavu, iya Huye n’irya Nyarugenge arahakana gutanga amabwiriza yo kwica umugororwa wibye ikiringiti no gukorera iyicarubozo abagororwa, akemeza ko yagambaniwe n’abakomeye.
Mu rubanza rwabereye mu rukiko rw’ibanze rwa Rubavu, CSP Kayumba yagize ati: “Ibi byose igituma mvuga yuko ari ubugambanyi, mwagiye mubona ba bandi bise abatangabuhamya ariko njye nabita abatangabinyoma.”
Kayumba arashinjwa gutanga amabwiriza yo kwica umugororwa witwa Nzeyimana Jean Marie Vianney tariki ya 6 Kamena 2019 ariko we avuga ko icyo gihe yari yagiye mu nama yaberaga ku cyicaro gikuru cy’urwego rushinzwe igorora, RCS, bityo ko abeshyerwa.
Abari abagororwa batanze ubuhamya mu bugenzacyaha n’ubushinjacyaha, bavuga ko Kayumba ari we watanze aya mabwiriza. Gusa we yavuze ko batakabaye bizerwa kuko ubwo bari bafunzwe, bari barananiranye, bimurirwa mu magororero atandukanye.
Kayumba yagize ati: “Nyakubahwa Perezida w’iburanisha, nkumenyeshe ko iyi ari imigambi nacuriwe y’ubugira kabiri. Ubwa mbere ngira ngo mwigeze kubona umugororwa witwa Ahorushakiye Protogene ukomoka muri Ngororero wagaragaye ku mateleviziyo atandukanye, agaragaza ko yamugajwe na Kayumba Innocent, nyamara RIB yarakurikiranye, isanga yakoze inyandiko mpimbano. Uwo ni umugambi wari wacuzwe wo kugira ngo anshyireho ibyaha, abikoranye n’abandi bantu.”
Itabwa muri yombi rya Kayumba [yasezerewe muri RCS] hamwe n’abandi bofisiye bo muri uru rwego ryakurikiye ubuhamya bwa Ndagijimana alias Peter wavuze ko yakubiswe mu 2020, bitegetswe n’abayobozi b’igororero rya Rubavu, bikamuviramo ubumuga.
Ubu buhamya bwatumye hakorwa iperereza, hagaragazwa n’ibindi byaha bishobora kuba byarakorewe abagororwa na mbere y’uwo mwaka, ari byo byatumye abarimo CSP Kayumba n’abo bakoranye atabwa muri yombi.
About The Author
