Umunyamakuru Lorenzo Christian Musangamfura yasubiye muri RBA, nyuma yo kwirukanwa muri iki kigo azira ibyafashwe nko gusaba agacupa Minisitiri w’Uburinganire n’Iterambere ry’Umuryango.
Mu Ugushyingo umwaka ushize ni bwo uyu munyamakuru uri mu beza bakizamuka mu mikino igihugu gifite yirukanwe kuri Radiyo Rwanda, nyuma yo kubwira Minisitiri Bayisenge Jeannette ko “nta cupa rye” azi.
Ni ubutumwa bwatumye uyu musore yibasirwa n’abakoresha imbuga nkoranyambaga bamushinje gushyanuka kuri uriya muyobozi, ibyatumye anirukanwa kuri Radiyo y’Igihugu.
Mu kiganiro nyirubwite yigeze guha Chaîne ya YouTube ya Chita Magic yemeye koko ko yateshutse, gusa avuga ko ubutumwa bwafashwe nko gusaba icupa Minisitiri yabwanditse mu rwego rwo gushyenga, bijyanye no kuba yikundira kuganira.
Amakuru BWIZA yamenye ni uko kuri uyu wa Kabiri ari bwo Lorenzo Christian yasubiye kuri RBA yari amaze amezi atandatu yirukanweho.
Umunyamakuru w’imikino, Rigoga Ruth, ari mu bamuhaye ikaze mu butumwa yanditse ku rubuga rwe rwa Twitter.
Ati: “Ikaze nanone muhungu mwize. Ngwino wongere utigise umujyi wa Nyarugenge Lorenzo Christian.”
Ubutumwa bwa Rigoga bwari buherekeje ifoto y’uyu musore asoma ikirango cya Radiyo Rwanda.
RBA yisubije Musangamfura, mu mwaka ushize Arthur Asiimwe uyobora iki kigo yari yamushimagije nk’umwe mu banyamakuru bafite impano ikomeye mu mwuga w’itangazamakuru, atanga isezerano ry’uko azamutumira bagasangira agakawa ndetse akamugira inama.
About The Author
